नवी दिल्ली (इंडिया दर्पण वृत्तसेवा) – दिल्लीचे मुख्यमंत्री अरविंद केजरीवाल यांनी आज दावा केला की, आरोग्यमंत्री सत्येंद्र जैन यांच्यानंतर आता त्यांच्या सरकारचे उपमुख्यमंत्री मनीष सिसोदिया यांना अटक होऊ शकते. त्यांना कोणत्याही खोट्या प्रकरणात गोवले जाऊ शकते. आता आम आदमी पक्षानेही सांगितले आहे की, कोणत्या प्रकरणात सिसोदिया यांना तुरुंगात पाठवले जाण्याची शक्यता आहे. सिसोदिया यांना गोवण्यासाठी केंद्राने 3 वर्षे जुने प्रकरण उभे करण्याचा कट रचल्याचा दावा पक्षाने केला आहे.
आप नेत्या आतिशी यांनी दावा केला की, केंद्राने त्यांच्या सर्व तपास यंत्रणा, आयकर, अंमलबजावणी संचालनालय (ईडी), दिल्ली पोलीस आणि सीबीआयला सिसोदिया यांना अटक करण्यासाठी ‘बनावट’ खटल्याची तयारी सुरू करण्याचे आदेश दिले आहेत. त्यांनी दावा केला की आरोग्य आणि वीज यासह विविध विभाग हाताळणारे सत्येंद्र जैन यांना अंमलबजावणी संचालनालयाने “कोणत्याही नव्या पुराव्याशिवाय” एका प्रकरणात अटक केली होती.
आतिशीने यांनी एक कथित कागदपत्र दाखविले ज्यामध्ये लाचलुचपत प्रतिबंधक शाखेने (ACB) भाजपच्या दिल्ली युनिटचे नेते हरीश खुराना आणि नीलकांत बक्षी यांच्याकडून दाखल केलेल्या तक्रारीच्या संदर्भात अतिरिक्त तपशील आणि कागदपत्रे मागितली होती. या दोन्ही भाजप नेत्यांनी सिसोदिया आणि जैन यांचा शाळेच्या वर्गखोल्या आणि इमारतींच्या बांधकामात 2000 कोटी रुपयांचा घोटाळा झाल्याची तक्रार केली होती. 2 जुलै 2019 रोजी पोलिस उपायुक्त, नवी दिल्ली यांना तक्रार करण्यात आली, जी एसीबीकडे पाठवण्यात आली.
आतिशी म्हणाल्या की, “गेली ३ वर्षे हे प्रकरण कुठे होते? यात भ्रष्टाचार झाला नसल्याचे सर्व यंत्रणांना माहित असल्याने या प्रकरणात काहीही झाले नाही. केंद्र आप आमदारांच्या मागे का आहे?” ते म्हणाले, “मुख्यमंत्री (अरविंद) केजरीवाल यांनी काही महिन्यांपूर्वी त्यांच्या अटकेची भीती व्यक्त केली होती आणि तेच घडले. आता सिसोदिया यांना अटक होणार असल्याची माहिती मिळाली आहे.
