औरंगाबाद (इंडिया दर्पण वृत्तसेवा) – लातूरहून औरंगाबादला येणाऱ्या एसटी बसला बीड जिल्ह्यातील आंबेजोगाई तालुक्यात भीषण अपघात झाला आहे. या दुर्घटनेत ६ जण ठार झाले असून ८ प्रवासी जखमी झाले आहेत. सायगाव जवळ बस आणि ट्रक यांच्यात हा भीषण अपघात झाला. जखमींवर आंबेजोगाईच्या सरकारी दवाखान्यात उपचार सुरू आहेत.
आज सकाळी लातूरहून एसटी बस निघाली. ही बस आंबेजोगाई तालुक्यातील सायगाव या गावाजवळून जात होती. त्याचवेळी एक ट्रक प्लास्टिकचे पाईप घेऊन आंबेजोगाईहून लातूरकडे जात होता. सायगाव गावाजवळील बर्दाफूर फाट्याजवळ असलेल्या एका वळणावर ट्रक आणि बस यांच्यात भीषण धडक झाली.
https://twitter.com/BHARATGHANDAT2/status/1480070303094960130?s=20
नक्की कशामुळे हा अपघात झाला हे अद्याप स्पष्ट झालेले नाही. मात्र, हा अपघात एवढा मोठा होता की, बसमधील ६ प्रवासी जागीच ठार झाले तर ८ प्रवासी जखमी झाले. दुर्घटनेची माहिती त्वरीत पोलिसांना देण्यात आली. तातडीने अॅम्ब्युलन्स मागवून जखमींना आंबेजोगाईच्या सरकार दवाखान्यात भरती करण्यात आले आहे.
