नवी दिल्ली (इंडिया दर्पण ऑनलाईन डेस्क) – आधुनिक काळात वेगवेगळे तंत्रज्ञान उपलब्ध झाले असून मोबाईल आणि संगणकाच्या माध्यमातून अनेक सोयी-सुविधा उपलब्ध झाल्या तरी त्यामुळे मोठ्या प्रमाणात फसवणूक देखील होत असल्याचे दिसून येते. विशिष्ट सायबर क्राईम गुन्हेगारी वाढली असून यामध्ये तरुणांचा मोठ्या प्रमाणावर समावेश आहे.
अयोध्या येथील डॉ. राम मनोहर लोहिया विद्यापीठातून एमएससी करत असलेला विद्यार्थी त्याच्या सहकाऱ्यांसह सोशल मीडियाच्या माध्यमातून अनेकांकडून पैसे उकळत असे. तो नागरिकांचे इन्स्टाग्राम सारखे सोशल मीडिया अकाउंट हॅक करायचा आणि त्यांच्या मित्र आणि नातेवाईकांकडून देखील पैसे मागायचा. प्राथमिक चौकशीत त्याने शेकडो नागरिकांची लाखो रुपयांची फसवणूक केल्याचे समोर आले आहे.
दिल्लीतील दक्षिण-पश्चिम जिल्ह्याच्या सायबर पोलिसांनी आरोपी विद्यार्थ्याला अभिषेक आणि त्याचे दोन साथीदार दीपक आणि सुमितसह अटक केली आहे. त्यांच्याकडून तीन मोबाईल फोन, एक टॅब, पाच सिमकार्ड, एक एटीएम कार्ड, तीन आधार कार्ड जप्त करण्यात आले आहेत. नॅशनल सायबर क्राइम पोर्टलद्वारे दि. 25 डिसेंबरला तक्रार प्राप्त झाली होती. याबाबतच्या तक्रारीत म्हटले आहे की, तिचा इन्स्टाग्राम आयडी अज्ञात व्यक्तींनी हॅक केला आहे. या गुंडांनी त्याचा नोंदणीकृत ई-मेल आयडी आणि मोबाईल क्रमांकही बदलला आहे. मदतीच्या बहाण्याने नातेवाईक आणि मित्रांकडून पैसे मागितले जात आहेत. मित्रांनीही पेटीएम खात्यात सात हजार रुपये ट्रान्सफर केले आहेत. गुन्हा नोंदवून तपास सुरू केला.
पेटीएममध्ये कोणत्या खात्यात पैसे जमा झाले, याचा शोध पोलिसांना लागला. तपासादरम्यान दिल्ली कॅन्टमध्ये राहणारे दीपक पांचाळ यांच्या खात्यात पैसे जमा झाल्याचे आढळून आले. पोलिसांनी दीपकला अटक केली. विशेष म्हणजे अभिषेक हा सोशल मीडिया अकाउंट हॅक करण्याचा मास्टरमाईंड आहे. डॉ. राम मनोहर लोहिया विद्यापीठ, फैजाबाद येथे अयोध्येतून बीएससी केल्यानंतर एमएससी करत आहे. ग्रॅज्युएशननंतर त्याने यूपीमध्ये सीसीसी परीक्षाही उत्तीर्ण केली आहे. तसेच युट्यूब हॅक करणाऱ्या सोशल मीडियावरून त्याने माहिती घेतली.
