नाशिक – तीन लाखाची घरफोडी, मखमलाबाद रोड परिसरातील घटना

तीन लाखाची घरफोडी
नाशिकः बंद घराच्या किचनीची खिडकी तोडून अज्ञात चोरट्याने कपाटातील सोन्या चांदीचे दागिने व रोख रक्कम असा सुमारे ३ लाखाचा ऐवज चोरून नेल्याची घटना शुक्रवारी (दि.६) मखमलाबाद रोड परिसरात उघडकीस आली. या प्रकरणी शंकुतला भोये ( रा. रा. सुरगाणा, सध्या मखमलाबाद) यांनी तक्रार दाखल केली आहे. भोये कुंटुंंबिय बाहेरगावी गेले असताना शनिवार ते रविवारच्या दरम्यान त्यांच्या घराच्या खिडकीचे गज कापून अज्ञात चोरट्यांनी बेडरूममधील लोखंडी कपाटातील ठेवलेले ३ लाख रूपयांची रोकड व ४ हजार रुपयाचे सोन्या-चांदीचे दागिने असा ऐवज चोरून नेल्याप्रकरणी म्हसरूळ पोलीस ठाण्यात गुन्हा दाखल करण्यात आला आहे. अधिक तपास पोलीस उपनिरिक्षक माळी करीत आहेत.

…..

दारू अड्डयावर छापा
नाशिकः मुंबईनाका परिसरातील खाऊगल्ली येथे अवैध मद्यविक्री दारू अड्ड्यावर रविवारी सकाळी मुंबईनाका पोलीसांनी छापा टाकून एकास अटक केले आहे. विशाल सुरेश चव्हाण (२५, रा. कालिकामंदिर मागे, सहवासनगर) असे अटक करण्यात आलेल्या संशयिताचे नाव आहे. पोलीसांनी दिलेल्या माहितीनुसार मुंबईनाका परिसरात हॉटेल संदिपच्या समोर असलेल्या खाऊ गल्ली येथे अवैधरीत्या देशी दारूची विक्री होत असल्याची माहिती मिळाल्यानंतर मुंबईनाका पोलीसांनी या ठिकाणी छापा टाकून सराईतास अटक केली. त्यांच्याकडून हजार रूपयांच्या दारूच्या बाटल्या जप्त करण्यात आल्या आहेत. याप्रकरणी मुंबईनाका पोलीस ठाण्यात गुन्हा दाखल करण्यात आला आहे. अधिक तपास पोलीस हवालदार सोनार करत आहेत.