नाशिक – नगरसेवक विशाल संगमनेरे यांच्या संपर्क कार्यालयावर दगडफेक, गुन्हा दाखल

नगरसेवकाच्या संपर्क कार्यालयावर दगडफेक
नाशिक : पूर्व वैमनस्यातून नगरसेवकास शिवीगाळ करीत दुचाकीस्वार टोळक्याने संपर्क कार्यालयावर दगडफेक केल्याची घटना जेलरोड भागात घडली. याप्रकरणी दहा जणांच्या टोळक्याविरूध्द नाशिकरोड पोलीस ठाण्यात गुन्हा दाखल करण्यात आला आहे. ऋषीकेश उर्फ तात्या चौधरी,सचिन डांगे,अमोल बोराडे,आदित्य बोराडे,निखील बोराडे (रा.सर्व बोराडे मळा,जेलरोड) व त्यांचे पाच अनोळखी साथीदार अशी दगडफेक करणा-या संशयीतांची नावे आहेत. याप्रकरणी सुनिल पोपट धोंगडे (रा.नांदूरगाव) यांनी तक्रार दाखल केली आहे. धोंगडे शुक्रवारी (दि.४) सायंकाळच्या सुमारास नगरसेवक विशाल संगमनेरे यांच्या कार्यालयात कामानिमित्त जात असतांना ही घटना घडली. गणेश व्यायामशाळा जवळील कन्हैय्या अपार्टमेंट मध्ये असलेल्या संपर्क कार्यालयात जात असतांना दुचाकीवर डबलसिट आलेल्या संशयीत टोळक्याने हा हल्ला केला. नगरसेवक संगमनेरे आपल्या कार्यालयात नसतांना संशयीतांनी त्यांना शिवीगाळ करीत त्यांच्या कार्यालयावर दगडफेक केली. तसेच कार्यालयास लावलेला अ‍ॅक्रेलीक बोर्ड टोळक्याने लाठ्या काठ्यांनी फोडून नुकसान केले. यावेळी संशयीतांनी संगमनेरे भेटला तर सोडणार नाही अशी धमकी देवून दहशत माजवत पोबारा केला. अधिक तपास उपनिरीक्षक माळी करीत आहेत.

…..

दोन मोटारसायकली चोरी
नाशिक : शहरात मोटारसायकल चोरटे सक्रिय झाले असून नुकत्याच दोन मोटारसायकली वेगवेगळया भागातून भामट्यांनी पळवून नेल्या. याप्रकरणी म्हसरूळ आणि देवळाली कॅम्प पोलीस ठाण्यात गुन्हे दाखल करण्यात आले आहेत. दिंडोरीरोड भागात राहणारे चेतन रमेश अहिरे (रा.बालाजी प्लॉसम,विनायक नगर) यांनी दिलेल्या तक्रारीनुसार,अहिरे यांची अ‍ॅक्टीव्हा एमएच १५ एफवाय ३०५४ गेल्या ३० एप्रिल ते १७ मे दरम्यान त्यांच्या सोसायटीच्या पार्किंगमध्ये लावलेली असतांना चोरट्यांनी चोरून नेली. याप्रकरणी म्हसरूळ पोलीस ठाण्यात गुन्हा दाखल करण्यात आला असून अधिक तपास जमादार पवार करीत आहेत. दुसरी घटना देवळाली कॅम्प रेल्वेस्थानक भागात घडली. घोरवड ता.सिन्नर येथील सुनिल राजाराम भुजबळ हे गेल्या सोमवारी (दि.३०) देवळाली कॅम्प रेल्वेस्थानकात गेले होते. रेल्वे पार्किंगमध्ये लावलेली त्यांची पल्सर एमएच १५ जीजी ९१३८ चोरट्यांनी पळवून नेली. याप्रकरणी देवळाली कॅम्प पोलीस ठाण्यात गुन्हा दाखल करण्यात आला असून अधिक तपास हवालदार शेवाळे करीत आहेत.