नाशिक – भाजीपाला खरेदी करण्यासाठी गेलेल्या महिलेची सोन्याची पोत दुचाकीस्वारांनी ओरबाडून नेली
नाशिक – दिंडोरीरोडवरील किशोर सुर्यवंशी मार्गावर महिलेची सुमारे ७० हजार रूपये किमतीची सोन्याची पोत दुचाकीस्वार भामट्याने ओरबाडून नेल्याची घटना घडली. मिना रमेश आगळे (रा.छत्रपती शिवाजीनगर,म्हसरूळ) यांनी याप्रकरणी तक्रार दाखल केली आहे. आगळे या बुधवारी सायंकाळी परिसरातील भाजी मंडईत भाजीपाला खरेदी करण्यासाठी गेल्या होत्या. वृंदावननगर येथील सुर्योदय बंगल्या समोरील मोकळय़ा प्लॉटजवळून त्या पायी जात असतांना हेल्मेट परिधान केलेल्या दुचाकीस्वाराने त्यांच्या गळयातील सोन्याची पोत ओरबाडून पोबारा केला. याप्रकरणी म्हसरूळ पोलीस ठाण्यात जबरी चोरीचा गुन्हा दाखल करण्यात आला आहे. अधिक तपास सहाय्यक निरीक्षक आहिरे करीत आहेत.
घरात शिरून चोरट्यांनी मोबाईल व मंगळसूत्र केले लंपास
नाशिक – वाघाडी येथे उघड्या घरात शिरून चोरट्यांनी मोबाईल व मंगळसूत्र लंपास केले. याप्रकरणी पंचवटी पोलीस ठाण्यात चोरीचा गुन्हा दाखल करण्यात आला आहे. सागर मुरलीधर आंबेकर (रा.वाल्मिकनगर,संजयनगर) यांनी तक्रार दाखल केली आहे. आंबेकर कुटूंबिय बुधवारी (दि.१६) आपल्या कामात व्यस्त असतांना ही घटना घडली. अज्ञात चोरट्यांनी मागच्या उघड्या दरवाजातून प्रवेश करीत घरातील तीन मोबाईल व कपाटातील सोन्याचे मंगळसूत्र असा सुमारे ३५ हजाराचा ऐवज चोरून नेला. अधिक तपास हवालदार घुगे करीत आहेत.
