नाशिक – आडगाव -म्हसरूळ लिंकरोडवर भरधाव पिकअप वाहनाने धडक दिल्याने दुचाकीस्वाराचा मृत्यू
नाशिक : आडगाव म्हसरूळ लिंकरोडवर भरधाव पिकअप वाहनाने धडक दिल्याने ५५ वर्षीय दुचाकीस्वाराचा मृत्यू झाल्याची घटना घडली. सुभाष वामन कोठावदे (५५) असे अपघातात ठार झालेल्या दुचाकीस्वाराचे नाव आहे. याप्रकरणी देवेंद्र सोनगीरे यांनी दिलेल्या तक्रारीवरून पसार झालेल्या अज्ञात पिकअप चालकाविरूध्द गुन्हा दाखल करण्यात आला आहे. या घटनेबाबत मिळालेली माहिती अशी की, कोठावदे मंगळवारी राधा कांबळे या महिलेस सोबत घेवून दळण दळण्यासाठी गिरणीवर जात असतांना हा अपघात झाला. कोठावदे दुचाकीने जात असतांना आडगाव म्हसरूळ लिंकरोडरील देशमुख चौकात रस्ता ओलांडत असतांना भरधाव आलेल्या अज्ञात पिकअपने त्यांच्या गाडीस जोरदार धडक दिली. या अपघातात दोघे गंभीर जखमी झाले. त्यातील चालक कोठावदे यांचा मृत्यू झाला.असून अधिक तपास उपनिरीक्षक चतुर करीत आहेत.
बांधकाम साईटवरील शेड मधून साहित्य चोरीला
नाशिक : ओढा रेल्वे स्थानक परिसरात बांधकाम साईटवरील शेड मधून चोरट्यांनी ब्रेकर मशीन,पाण्याची मोटार असा सुमारे २१ हजार रूपये किमतीचा ऐवज चोरून नेला. याप्रकरणी कैलास भागवत जाधव (रा.लोखंडे मळा,हनुमाननगर जेलरोड) यांनी तक्रार दाखल केली आहे. ओढा रेल्वेस्टेशन नजीक सुरू असलेल्या बांधकाम साईटवर ही घटना घडली. अज्ञात चोरट्यांनी २८ फेब्रुवारी ते १ मार्च दरम्यान साईटवरील उघड्या शेडमधून भिंत तोडण्याचे ब्रेकर मशीन,विहीरीतून पाणी काढण्यासाठी लागणारा पंप,लोखंड कट करण्याचे मशिन,बांधकामाचे लोखंडी स्क्रॅप मटेरियल असा सुमारे २१ हजार ५०० रूपये किमतीचा ऐवज चोरून नेला. आडगाव पोलीस ठाण्यात याप्रकरणी चोरीचा गुन्हा दाखल करण्यात आला आहे. अधिक तपास पोलीस नाईक जाधव करीत आहेत.
