नाशिक – लिंबू फेकल्याच्या कारणातून शेजा-यांमध्ये हाणामारी, परस्पर विरोधी गुन्हे दाखल

लिंबू फेकल्याच्या कारणातून शेजा-यांमध्ये हाणामारी
नाशिक : भारावलेले लिंबू फेकल्याच्या अंधश्रद्धेतून शेजा-यांमध्ये तुंबळ हाणामारी झाल्याची घटना वडाळागावात घडली. याप्रकरणी इंदिरानगर पोलीस ठाण्यात परस्पर विरोधी गुन्हे दाखल करण्यात आले आहेत.
अफसर अन्सा शहा (रा.केबीएच शाळेसमोर) यांनी दिलेल्या तक्रारीनुसार, गेल्या बुधवारी (दि.२) शेजारी राहणारे अल्ताफ शहा यांच्या घरातून अफसर शहा यांच्या दारात लिंबू फेकण्यात आला होता. याबाबत वडिल अन्सार शहा यांनी शेजा-यांना विचारणा केली असता संशयीत अल्ताफ शहा, अख्तर उर्फ विकी शहा, जावेद शेरू बशीर शहा व गुलाब रज्जा आयु शहा आदींनी शिवीगाळ व जीवे मारण्याची धमकी देत तक्रारदार, वडिल व भाऊ निसार यांना लोखंडी रॉडने बेदम मारहाण केली. या घटनेत बापलेक जखमी झाले आहेत. तर मेहजबी अख्तर हुसेन या महिलेने दिलेल्या तक्रारीनुसार लिंबू फेकल्याचा जाब विचारण्यासाठी आलेल्या अन्सार शहा, निसार शहा व अफसर शहा आदींनी महिलेसह पती अख्तर व मुलास धारदार शस्त्र आणि लोखंडी रॉडने मारहाण केल्याचे म्हटले आहे. अधिक तपास हवालदार कोकाटे व पोलीस नाईक बरेलीकर करीत आहेत.

….

कोणार्क नगरला एकाची आत्महत्या
नाशिक : घराच्या जीन्यात एकाने वायरच्या सहाय्याने गळफास लावून घेत आत्महत्या केल्याची घटना कोणार्कनगर भागात घडली. सदर व्यक्तीच्या आत्महत्येचे कारण समजू शकले नाही. याप्रकरणी आडगाव पोलीस ठाण्यात मृत्युची नोंद करण्यात आली आहे. सोपान सुरेश गवांदे (रा. बालाजी रेसिडेन्सी, कोणार्कनगर आडगाव) असे आत्महत्या करणा-या व्यक्तीचे नाव आहे. पोलीसांनी दिलेल्या माहितीनुसार गुरूवारी (दि.३) सकाळी सोपान हे जीन्याखाली गळ्यात काळ्या रंगाची वायर अडकवून पडलेल्या स्थितीत आढळून आले. वायर जिन्याला बांधलेली असल्याने त्यांनी आत्महत्या केल्याची शक्यता वर्तविण्यात येत असून अधिक तपास हवालदार ए.एम. मुसळे करीत आहेत.