नाशिक – पेठफाटा भागात पिशवीला ब्लेड मारून २५ हजाराची रोकड चोरट्यांनी केली लंपास
नाशिक : पेठफाटा भागात बँकेतून पैसे काढून घराकडे परणा-या ७८ वर्षीय सायकलस्वाराच्या पिशवीतील रोकड चोरट्यांनी लंपास केली. याप्रकरणी पंचवटी पोलीस ठाण्यात चोरीचा गुन्हा दाखल करण्यात आली आहे. पिशवीला ब्लेड मारून सुमारे २५ हजाराची रोकड लांबविण्यात आली असून क्रिष्णा दगडू चव्हाण (रा.आपला महाराष्ट्र कॉलनी,हिरावाडी रोड) यांनी याप्रकरणी तक्रार दाखल केली आहे. चव्हाण गुरूवारी स्टेट बँक ऑफ इंडियाच्या पेठफाटा शाखेत आले होते. २५ हजाराची रोकड काढून ते घराकडे सायकलीवर जात असतांना ही घटना घडली. सायकलीच्या हॅण्डलला पैश्यांची पिशवी टांगून ते घराकडे निघाले असता अज्ञात चोरट्याने पिशवीस ब्लेड मारून रोकड लांबविली. ही घटना अवघ्या काही अंतरावरील पेठ नाका सिग्नल भागात उघडकीस आली. पिशवीतील रोकड पडल्याचे लक्षात येताच त्यांनी माघारी फिरत शोधाशोध केली मात्र ती हाती लागली नाही. यानंतर त्यांनी पोलीसात धाव घेतली असून अधिक तपास जमादार ठाकरे करीत आहेत.
भिमवाडी भागात घरफोडी
नाशिक : भिमवाडी भागात घरफोडीत चोरट्यांनी एलईडी टिव्हीसह संसारोपयोगी वस्तू चोरून नेल्याप्रकरणी भद्रकाली पोलीस ठाण्यात गुन्हा दाखल करण्यात आला आहे. राहूलसिंग धरमसिंग टाक (रा.सहकारनगर) यांनी तक्रार दाखल केली आहे. टाक कुटूंबिय बुधवारी बाहेरगावी गेले असता अज्ञात चोरट्यांनी बंद घराचे कुलूप तोडून सेटऑप बॉक्स,एलईडी टिव्ही,गॅस सिलेंडरच्या दोन टाक्या व चांदीची पट्टी असा सुमारे ९ हजार ५०० रूपये किमतीचा ऐवज चोरून नेला. अधिक तपास उपनिरीक्षक माळी करीत आहेत.
