नाशिक : पार्क केलेली अ‍ॅटोरिक्षा चोरून नेणा-या मालेगाव येथील सराईतास पोलीसांनी गजाआड केले आहे. राजेंद्र मधुकर हिरे (४० रा.सोयगाव ता.मालेगाव) असे अटक केलेल्या संशयीत चोरट्याचे नाव असून तो पोलीस रेकॉर्डवरील सराईत गुन्हेगार आहे.संशयीताच्या ताब्यातून रिक्षा हस्तगत करण्यात आली असून, याप्रकरणी भद्रकाली पोलीस ठाण्यात गुन्हा दाखल करण्यात आला आहे. याप्रकरणी बापू दिनकर पगारे (रा.म्हसरूळ) यांनी तक्रार दाखल केली होती. पगारे हे रिक्षा चालक असून ते रविवारी सायंकाळच्या सुमारास मेनरोड भागात गेले होते. वावरे लेन येथील चर्च समोर एमएच १५ झेड ६९९१ अ‍ॅटोरिक्षा पार्क करून ते कामानिमित्त परिसरात गेले असता त्यांची रिक्षा चोरीस गेल्याचे निदर्शनास आले होते. याप्रकरणी भद्रकाली पोलीस ठाण्यात गुन्हा दाखल करण्यात आला होता. पोलीसांनी संशयितास शोधून काढले असून त्याच्या ताब्यातून रिक्षा हस्तगत करण्यात आली आहे. अधिक तपास पोलीस नाईक ठेपणे करीत आहेत.
