दीड लाखांच्या मुद्देमालावर डल्ला ; शहरात दोन वेगवेगळ्या ठिकाणी घरफोड्या
नाशिक : शहरात वेगवेगळ्या भागात झालेल्य घरफोडींच्या घटनांमध्ये चोरट्यांनी सुमारे दीड लाखांच्या मुद्देमालावर डल्ला मारला. त्यात रोकडसह सोन्याचांदीच्या दागिण्यांचा समावेश आहे. या प्रकरणी भद्रकाली आणि पंचवटी पोलिस ठाण्यात स्वंतत्र गुन्हे दाखल करण्यात आलेत.
अमरधाम रोडवरील सादेका अयुब खान (रा. नागझीरे, नानावली) यांनी दिलेल्या तक्रारीनुसार, खान कुटूंबिय रविवारी (दि.२०) आपआपल्या कामानिमित्त घराबाहेर पडले. नेमकी ही संधी चोरट्यांनी साधली. अज्ञात चोरट्यांनी लपविलेल्या चावीच्या माध्यमातून घर उघडून स्टिलच्या पेटीत ठेवलेली ५० हजाराची रोकड आणि सोन्याची अंगठी असा सुमारे ६५ हजाराचा मुद्देमाल चोरून नेला. या प्रकरणी भद्रकाली पोलीस ठाण्यात घरफोडीचा गुन्हा दाखल करण्यात आला. अधिक तपास उपनिरीक्षक गवळी करीत आहेत. दुसरी घटना अमृतधाम भागात घडली. प्रतिभा छत्रपती कन्नलू (रा. साईदिप अपार्ट. बाफना बाजारजवळ लक्ष्मीनगर) यांनी या प्रकरणी तक्रार दिली. कन्नलू कटूंबिय १३ ते १८ फेब्रुवारी दरम्यान बाहेरगावी गेले असता ही घटना घडली. अज्ञात चोरट्यांनी त्यांच्या बंद घराचा कडीकोयंडा तोडून कपाटाच्या ड्राव्हरचे लॉक तोडून सुमारे ८३ हजार ६८८ रूपये किमतीचे सोन्याचांदीचे अलंकार चोरून नेले. या प्रकरणी पंचवटी पोलीस ठाण्यात गुन्हा दाखल करण्यात आला असून, अधिक तपास उपनिरीक्षक सोनवणे करीत आहेत.
दोन अॅटोरिक्षांसह दुचाकी चोरी
नाशिक : शहरात वाहनचोरीचे सत्र सुरूच आहे. नुकतेच वेगवेगळ्या भागात पार्क केलेल्या दोन अॅटोरिक्षांसह एक मोटारसायकल चोरट्यांनी चोरून नेली. खडकाळी येथील अन्सार अब्बास शेख हे गुरूवारी (दि.१७) रात्री तलावडी भागात हात उसणवार दिलेले पैसे घेण्यासाठी गेले होते. पिंपळचौकात त्यांनी आपली अॅटोरिक्षा एमएच १५ एके ६१९७ पार्क केली असता ती चोरट्यांनी चोरून नेली. ही घटना शेख पैसे घेवून परतले असता निदर्शनास आली. या प्रकरणी भद्रकाली पोलीस ठाण्यात गुन्हा दाखल करण्यात आला. अधिक तपास पोलीस नाईक आहेर करीत आहेत. ठक्कर बाजार बसस्थानक परिसरात सुद्धा रिक्षा चोरीची घटना घडली. या प्रकरणी आप्पासाहेब मारूती नाईक (रा. सावरकर चौक, सिडको) यांनी दिलेल्या तक्रारीनुसार, त्यांनी आपली अॅटोरिक्षा एमएच १५ झेड ७९४५ गेल्या बुधवारी (दि.९) ठक्कर बाजार रिक्षा स्टॅण्ड येथील महाविर कुरीअर समोर पार्क केलेली असतांना चोरट्यांनी ती पळवून नेली. या प्रकरणी सरकारवाडा पोलीस ठाण्यात गुन्हा दाखल करण्यात आला. अधिक तपास पोलिस नाईक माळोदे करीत आहेत. तर नाशिक पुणा मार्गावरील नेहरूनगर येथे राहणारे प्रकाश श्रीधर बोंबले यांची शाईन दुचाकी एमएच १५ इसी ४४०८ शनिवारी (दि.१९) रात्री वास्को हॉटेल जवळील सागर कुशन दुकानासमोर लावलेली असतांना चोरट्यांनी चोरून नेली. या प्रकरणी नाशिकरोड पोलिस ठाण्यात गुन्हा दाखल करण्यात आला. अधिक तपास हवालदार कोकाटे करीत आहेत.
