नाशिक – राका कॉलनीत पूजा साहित्याची चोरी, सरकारवाडा पोलीस ठाण्यात गुन्हा दाखल

राका कॉलनीत पुजा साहित्याची चोरी
नाशिकः धर्मगुरू राहत असलेल्या फ्लॅटच्या उघड्या दरवाजातून प्रवेश करत चोरट्यांनी १२ हजार रूपयांचे पूजा साहित्य चोरी केल्याची घटना शुक्रवारी (दि.२८) राका कॉलनी परिसरात घडली. याप्रकरणी राजन गणेश पारीख यांनी तक्रार दाखल केली आहे. त्यानुसार येथील वर्धमान पार्क येथे ७ क्रमांकाच्या फ्लॅटमध्ये धर्मगुरू सौम्य रत्ना श्रीजी हे राहत असून ते शुक्रवारी सकाळी मंदिरात गेले असताना उघड्या दरवाजातून प्रवेश करत अज्ञात चोरट्याने मोबाईल, चांदीची अंगठी, नवग्रह पुजेचे यंत्र, १ हजार ८०० रूपये, तसेच इतर पूजा साहित्य व झाडाच्या कुंड्या चोरट्यांनी चोरून नेल्या. याप्रकरणी सरकारवाडा पोलीस ठाण्यात गुन्हा दाखल करण्यात आला आहे. पोलीस नाईक मरकड अधिक तपास करत आहेत.

….

वृद्ध मास्क विक्रेत्यास मारहाण
नाशिकः मास्कची किंमत जास्त सांगत असल्याच्या कारणावरून तीघांच्या टोळक्याने रस्त्यावर मास्क विक्री करणार्‍या वृद्ध विक्रेत्यास बेदम मारहाण केल्याचा प्रकार पंचवटीतील प्रमोद महाजन गार्डनसमोर घडला.
याप्रकरणी मधुक हरी शेजवळ (७०, रा. रासबिहारी रोड, पंचवटी) यांनी तक्रार दाखल केली आहे. त्यानुसार शेजवळ हे येथील प्रमोद महाजन गार्डन समोर रस्त्यावर मास्क विक्री करत असताना येथे आलेल्या अनोळखी तिघांनी मास्क पाहताना ३० रूपये अशी जास्त किंमत सांगत असल्याची कुरापत काढून लाथाबुक्कयांनी मारहाण केली. याप्रकरणी पंचवटी पोलीस ठाण्यात गुन्हा दाखल करण्यात आला आहे. अधिक तपास पोलीस नाईक भोळे करत आहेत.