नाशिक : अल्पवयीन मुली बेपत्ता होण्याच्या तीन घटना शहरात घडल्यामुळे पालकांकडून चिंता व्यक्त केली जात आहे. या तिन्ही मुली किरकोळ काम आणि विविध कारणे सांगून घराबाहेर पडल्या. त्यानंतर त्या परत आल्या नाही. याप्रकरणी पंचवटी,नाशिकरोड आणि अंबड पोलीस ठाण्यात अपहरणाचे गुन्हे दाखल करण्यात आले आहेत. सिडकोतील सेवादासनगर भागात राहणारी १६ वर्षीय युवती ३१ जानेवारी रोजी बेपत्ता झाली. किराणा दुकानात जावून येते असे सांगून गेली ती परत आली नाही. तिच्या वडिलांनी दिलेल्या तक्रारीवरून अंबड पोलीस ठाण्यात अपहरणाचा गुन्हा दाखल करण्यात आला आहे. तर दुसरी घटना मखमलाबाद रोडवरील क्रांतीनगर भागात येथे घडली आहे. १४ वर्षीय मुलगी २९ जानेवारी पासून बेपत्ता आहे. सायंकाळच्या सुमारास ती सार्वजनिक शौचालयात गेली होती. ती अद्याप परतली नाही. याप्रकरणी तिच्या आईने दिलेल्या तक्रारीवरून पंचवटी पोलीस ठाण्यात अपहरणाचा गुन्हा दाखल करण्यात आला आहे. तिसरी घटना पळसे गावात घडली. चौधरी बिल्डरर्स कॉलनीत राहणारी १५ वर्षीय मुलगी ३१ जानेवारी रोजी बेपत्ता झाली. जुनेद शेख (रा.बजरंगवाडी) या संशयीताने तिला आमिष दाखवून पळवून नेल्याचा संशय कुटूंबियांनी व्यक्त केला आहे. याप्रकरणी नाशिकरोड पोलीस ठाण्यात अपहरणाचा गुन्हा दाखल करण्यात आला आहे.
नाशिक – अल्पवयीन मुली बेपत्ता होण्याच्या शहरात तीन घटना; पालकांची चिंता वाढली
