फळविक्रेत्यांना त्रिकुटाकडून मारहाण
नाशिक : वाहनाचे नुकसान करून त्रिकुटाने फळविक्रेत्यांना बेदम मारहाण केल्याची घटना गोरेवाडी भागात घडली. या मारहाणीत संशयीतांनी लाठ्या काठ्यांसह कोयत्याचा वापर केल्याने फळविक्रेते जखमी झाले असून याप्रकरणी नाशिकरोड पोलीस ठाण्यात गुन्हा दाखल करण्यात आला आहे. शुभम बेनवाल,राहूल उज्जेनवाल,सलमान शेख असे फळ विक्रेत्यांना मारहाण करणा-या संशयीतांची नावे आहे. याप्रकरणी नितीन हनुमंत उद्दीनकर (रा.जेलरोड) या युवकाने तक्रार दाखल केली आहे. उद्दीनकर व त्याचे मित्र नितीन कुसाळकर आणि रोशन कुसाळकर हे तिघे रविवारी (दि.१८) सायंकाळच्या सुमारास गोरेवाडीतील रेल्वे गेटच्या पुढे व रिक्षा थांबा भागात ओमनी कारमधील टरबूज विक्री करीत असतांना ही घटना घडली. संशयीतांनी तिघा मित्रांना गाठून जेलरोड हा आमचा एरिया आहे. तुम्ही आमच्या एरियात टरबूज विक्री करायला का आलेत अशी कुरापत काढून शिवीगाळ केली. या वेळी संतप्त त्रिकुटाने तिघा फळविक्रेत्यांना लाकडी दांडक्याने मारहाण केली. तसेच तिघांवर कोयत्याने वार केल्याने फलविक्रेते जखमी झाले असून अधिक तपास उपनिरीक्षक भालेराव करीत आहेत.
…..
धोंगडे मळयातील घरफोडीत रोकड चोरी
नाशिक : बंद घर फोडून चोरट्यांनी कपाटातील साडीमध्ये ठेवलेली २५ हजाराची रोकड चोरून नेली. ही घटना नाशिकरोड परिसरातील धोंगडेमळा भागात घडली. याप्रकरणी उपनगर पोलीस ठाण्यात गुन्हा दाखल करण्यात आला आहे. अलोक त्रिभुवनदत्त शर्मा (रा.स्नेहबंधन कॉलनी,धोंगडेमळा) यांनी तक्रार दाखल केली आहे. शर्मा कुटूंबिय बाहेरगावी गेले असता ही घटना घडली. शनिवारी (दि.१७) रात्री अज्ञात चोरट्यांनी शर्मा यांच्या भावाच्या बंद बंगल्याचे कडी कोयंडा तोडून बेडरूममधील कपाटातून साडी खाली ठेवलेली रोकड व साडी चोरून नेली. अधिक तपास सहाय्यक निरीक्षक परदेशी करीत आहेत.
….
