नाशिक – घरात कोणी नसल्याची संधी साधत बळजबरीने घरात घुसून महिलेचा विनयभंग

महिलेचा विनयभंग
नाशिकः घरात कोणी नसल्याची संधी साधत बळजबरीने घरात घुसून महिलेचा एकाने विनयभंग केल्याची घटना सोमवारी (दि.२४) दुपारी जुने नाशिकच्या कुंभारवाडा परिसरात घडली. याकुब शहा (रा. भद्रकाली) असे गुन्हा दाखल झालेल्या संशयिताचे नाव आहे. पीडित महिलेने दिलेल्या तक्रारीनुसार घरात कोणी नसताना दुपारी अडीच वाजेच्या सुमारास संशयित शहा याने बळजबरी घरात प्रवेश करून महिलेचा विनयभंग केला. याप्रकरणी भद्रकाली पोलीस ठाण्यात गुन्हा दाखल करण्यात आला आहे. अधिक तपास उपनिरिक्षक सैंदाणे करत आहेत.

….

भिक्षेकरी महिलेच्या मुलाचे अपहरण
नाशिकः भद्रकाली परिसरात भिक्षा मागणार्‍या महिलेच्या ११ वर्षीय मुलाचे भर रस्त्यातून अपहरण करण्यात आल्याचा प्रकार शनिवारी (दि.२२) सायंकाळी दुध बाजार परिसरात घडला. समिर साजन सैय्यद (११) असे अपहृत बालकाचे नाव आहे. त्याच्या आईने दिलेल्या तक्रारीनुसार महिला व तीचा मुलगा शनिवारी सायंकाळी ७ वाजेच्या सुमारास दुधबाजार परिसरात भिक्षा मागत असताना महिलेची नजर चुकवून अज्ञात व्यक्तीने तीच्या ११ वर्षीय मुलाचे अपहरण केले. याप्रकरणी भद्रकाली पोलीस ठाण्यात अपहरणाचा गुन्हा दाखल करण्यात आला आहे. अधिक तपास पोलीस हवालदार डी.पी. पाळदे करत आहेत.

….

महिलेस चौघांकडून मारहाण
नाशिकः पोलीस ठाण्यात तक्रार दिल्याच्या कारणातून चौघांनी महिलेस बेदम मारहाण केली. तसेच दगड डोक्यात मारून गंभीर जखमी केल्याची घटना रविवारी (दि.२३ ) पांडवनगरी परिसरात घडली. याप्रकरणी प्रतिभा राजेंद्र मनोटे (रा. पांडवनगरी, इंदिरानगर) यांनी तक्रार दाखल केली आहे. त्यानुसार रविवारी सायंकाळी रूपाली दोंदे तीचा मुलगा गुड्डया, रवि उर्फ मॅरी व इतर असे सर्व मनोटे यांच्या घरी आले. मुलाविरूद्ध पोलीस ठाण्यात तक्रार दाखल केल्याच्या कारणातून दोंदे तसेच त्यांच्या साथीदारांनी मनोटे यांना बेदम मारहाण केली. तसेच डोक्यात दगड मारून गंभीर जखमी केले. याप्रकरणी इंदिरानगर पोलीस ठाण्यात गुन्हा दाखल करण्यात आला आहे.