दुकानातून दारूची चोरी
नाशिक : देशी दारूचे दुकान फोडून चोरट्यांनी प्रिन्स संत्रा नावाचे ७८ बॉक्स दारू चोरून नेल्याची घटना पंचशिलनगर भागात घडली. याप्रकरणी भद्रकाली पोलीस ठाण्यात गुन्हा दाखल करण्यात आला आहे. विजय गंगाराम विधाते (रा.टाकळीरोड,द्वारका) यांनी याप्रकरणी तक्रार दाखल केली आहे. विधाते यांचे खडकाळी सिग्नल भागात देशी दारू विक्रीचे दुकान आहे. संचारबंदीमुळे दुकान बंद असल्याने ही घटना घडली. अज्ञात चोरट्यांनी २ ते १८ एप्रिल दरम्यान बंद दुकानाच्या पाठीमागील शटरची कुलपे तोडून प्रिन्स संत्रा नावाच्या देशी दारूचे तब्बल ७८ खोकी चोरून नेली. त्यात सुमारे १ लाख ८३ हजार ३०० रूपये किमतीची दारू होती. अधिक तपास सहाय्यक निरीक्षक मोहिते करीत आहेत.
…..
अपघातात पादचारी ठार
नाशिक : भरधाव अज्ञात चारचाकीच्या धडकेत ५५ वर्षीय पादचारी ठार झाला. हा अपघात महामार्गावरील स्टार मोटार गॅरेज समोर झाला. मृत पादचारीची अद्याप ओळख पटली नसून याप्रकरणी आडगाव पोलीस ठाण्यात मृत्युची नोंद करण्यात आली आहे. शनिवारी (दि.१७) रात्री आडगाव शिवारातील स्टार मोटार गॅरेज समोर हा अपघात झाला. महामार्गावरून नाशिकच्या दिशेने पायी जाणा-या ५५ वर्षीय अनोळखी इसमास ओझरकडून भरधाव आलेल्या अज्ञात चारचाकी वाहनाने जोरदार धडक दिली. चालकाचे आपल्या वाहनावरील नियंत्रण सुटल्याने हा अपघात झाला. या अपघातात पादचारी गंभीर जखमी झाला होता. त्यात त्याचा मृत्यु झाला. याप्रकरणी जमादार पाटील यांनी दिलेल्या तक्रारीवरून गुन्हा दाखल करण्यात आला असून अधिक तपास उपनिरीक्षक जाधव करीत आहेत.
