नाशिक – गेल्या काही महिन्यांपासून सिडको परिसरामध्ये मोठ्या प्रमाणात गुन्हेगारी कारवायांमध्ये वाढ झाली असून त्याचा प्रत्यंतर पुन्हा एकदा रविवारी दुपारी बघायला मिळाला. एका युवकावर भर दिवसा टोळक्याने धारदार शस्त्राने वार करून त्यास गंभीर जखमी केल्याची घटना घडल्यामुळे सिडको परिसरात दहशतीचे वातावरण निर्माण झाले आहे. पोलीस प्रशासनाने यावर कडक कारवाई करण्याची मागणी नागरिकांकडून जोर धरू लागली आहे.
रायगड चौक परिसरातील शिवनेरी उद्यान परिसरात भर दिवसा २० वर्षीय तरुणावर पूर्व वैमनस्यातून टोळक्याकडून प्राणघातक हल्ला झाल्याची घटना घडली असून ही घटना सीसीटीव्ही मध्ये कैद झाली आहे. जखमी तरुणाला जिल्हा शासकीय रुग्णालयात दाखल करण्यात आले असून पुढील उपचार सुरू आहेत. या घटनेमुळे परिसरातील नागरिकांत भीतीचे वातावरण पसरले आहे.
सिडकोतील रायगड चौकातील शिवनेरी उद्यान परिसरात मोहन देवकर (२० रा. रायगड चौक ) हा तरुण उद्यान परिसरातून जात असतांना समोरून आलेल्या ५ ते ६ जणांच्या टोळक्याने पुर्व वैमनस्यातून कुरापत काढून मारहाण करण्यास सुरुवात केली. या दरम्यान टोळक्यातील एका तरुणाने जवळील कोयत्याने मोहनवर वार केले. या घटनेचे चित्रीकरण सीसीटीव्ही कॅमेऱ्यात झाले असून पोलिसांकडून संबंधित टोळक्याचा शोध घेतला जात आहे. टोळक्यातील बहुतांश मुले अल्पवयीन असल्याचा अंदाज पोलिसांनी व्यक्त केला आहे. या प्रकरणी रात्री उशीरा पर्यंत गुन्हा दाखल करण्याचे काम सुरू होते.
