नाशिक – अमृतधाम चौफुलीवर ट्रक कंटेनरच्या धडकेत एक ठार

ट्रक कंटेनरच्या धडकेत एक ठार
नाशिक : मालट्रक कंटेनरच्या धडकेत परप्रांतीय चालक ठार झाला. हा अपघात रस्ता ओलांडत असतांना महामार्गावरील अमृतधाम चौफुलीवर झाला. याप्रकरणी पंचवटी पोलीस ठाण्यात अपघाताची नोंद करण्यात आली आहे. मनोज कुमार (२२ रा.आाझमगड,उत्तरप्रदेश) असे अपघातात ठार झालेल्या कंटेनर चालकाचे नाव आहे. याप्रकरणी कंटेनर वरील क्लिनर सलूमुंद्दीन खान याने तक्रार दाखल केली आहे. अ‍ौरंगाबाद कडून तारवाला नगर रोडने भरधाव जाणा-या कंटेनरने (टीएस ११ युसी ६२६१) धुळे बाजू कडून महामार्गा वरून जाणा-या मालट्रकला धडक दिल्याने हा अपघात झाला. चौफुलीवर रस्ता ओलांडणा-या मालट्रकला निघून जावू न देता मृत चालकाने आपला कंटेनर दामटल्याने कंटेनर मालट्रकच्या पाठीमागील बाजूवर आदळला. त्यात कंटेनरचालकाचा मृत्यु झाला असून दोन्ही वाहनांचे मोठे नुकसान झाले आहे. अधिक तपास उपनिरीक्षक कासर्ले करीत आहेत.

…..

गाय वासराची चोरी
नाशिक : शहारात पाळीव जनावरेही सुरक्षीत राहिले नसून चरण्यासाठी सोडलेले गाय वासरू अज्ञात चोरट्यांनी चोरून नेल्याची घटना तारवाला नगर भागात घडली. याप्रकरणी पंचवटी पोलीस ठाण्यात चोरीचा गुन्हा दाखल करण्यात आला आहे.सुदाम सखाराम कासार (रा.उदय कॉलनी,मखमलाबाद रोड) यांनी याप्रकरणी तक्रार दाखल केली आहे. कासार यांनी रविवारी (दि.१६) आपली काठेवाडी क्रॉस जातीची ७० हजार रूपये किमतीचे गाय वासरू नेहमी प्रमाणे तारवाला नगर परिसरातील लामखेडे मळयातील मोकळया जागेत चरण्यासाठी सोडले असता अज्ञात चोरट्यांनी ते चोरून नेले. अधिक तपास जमादार ठाकरे करीत आहेत.

…..

सरकारी कामात अडथळा एकास अटक
नाशिक : कोवीड लस देण्याच्या कारणातून एकाने रूग्णालयात गोंधळ घालत सरकारी कामात अडथळा आणल्याचा प्रकार पंचवटी कारंजा भागात घडला. याप्रकरणी पोलीस रेकॉर्ड वरील एका संशयीतास अटक करण्यात आली असून याप्रकरणी पंचवटी पोलीस ठाण्यात गुन्हा दाखल करण्यात आला आहे. मृणाल भालचंद्र घोडके (३३ रा.लक्ष्मी प्राईड,टाकळीरोड) असे अटक केलेल्या संशयीताचे नाव आहे. याप्रकरणी विजय मोतीराम देवकर (रा.उंटवाडी) यांनी तक्रार दाखल केली आहे. ही घटना पंचवटी कारंजा येथील महापालिकेच्या इंदिरागांधी रूग्णालयात घडली. देवकर या रूग्णालयाचे वैद्यकीय अधिक्षक असून मंगळवारी (दि.१८) ते सेवा बजावत असतांना संशयीत तेथे आला. त्याने माझी आई व्हॅक्सीन घेण्यासाठी आली आहे. इतका वेळ लागतो का ? तुम्ही डॉक्टर माजले आहेत. असे म्हणून देवकर यांना शिवीगाळ करून दमदाटी केली. तसेच धक्काबुक्की करून कोवीड साथ रोगाचे प्रतिबंधक महत्वाचे काम करीत असतांना सरकारी कामात व्यत्यय आणला. अधिक तपास सहाय्यक निरीक्षक गवळी करीत आहेत.