सिडकोत चाकू हल्ला दोघांना अटक
नाशिक : मागील भांडणाची कुरापत काढून त्रिकुटाने एकावर चाकू हल्ला केल्याची घटना सिडकोतील उत्तम नगर भागात घडली. या घटनेत तरूण जखमी झाला असून पोलीसांनी दोघा हल्लेखोरांना जेरबंद केले आहे. त्याचा एक साथीदार अद्याप फरार असून याप्रकरणी अंबड पोलीस ठाण्यात गुन्हा दाखल करण्यात आला आहे. शुभम श्ंकर नेरकर (२१) व सुरेश प्रकाश धनगर (३० रा.दोघे एकताचौक,साईबाबा मंदिराजवळ) अशी अटक केलेल्या संशयीतांची नावे असून त्यांचा गौरव आखाडे नामक साथीदार अद्याप फरार आहे. याप्रकरणी सुरज प्रकाश येलमामे (रा.उत्तमनगर,सिडको) या युवकाने तक्रार दाखल केली आहे. सोमवारी (दि.१७) रात्री एकता चौकात ही घटना घडली. या घटनेत चेतन परशराम शिंदे (रा.एकता चौक,उत्तमनगर) हा युवक जखमी झाला. येलमामे व शिंदे चौकात उभे असतांना त्रिकुटाने त्यांना गाठले. यावेळी टोळक्याने मागील भांडणाची कुरापत काढून शिंदे याच्यावर धारदार चाकूने वार केले. या घटनेत शिंदे जखमी झाला असून अधिक तपास उपनिरीक्षक सोनवणे करीत आहेत.
…..
जेलरोडला तडीपार जेरबंद
नाशिक : गुन्हेगारी कारवायांमुळे सहा महिन्यांसाठी शहर आणि जिल्ह्यातून हद्दपार केलेले असतांना श्हरात वावर ठेवणा-या तडीपारास पोलीसांनी बेड्या ठोकल्या. ही कारवाई जेलरोड भागात करण्यात आली. याप्रकरणी नाशिकरोड पोलीस ठाण्यात गुन्हा दाखल करण्यात आला आहे. सुरेश राजाराम म्हस्के (४६ रा.शिवगंगा अपा. पाण्याच्या टाकीजवळ जेलरोड) यांनी याप्रकरणी तक्रार दाखल केली आहे. म्हस्के सराईत गुन्हेगार असून समज देवूनही त्याच्या गुन्हेगारी कारवाया सुरूच राहिल्याने त्यास सहा महिन्यांच्या कालावधीसाठी शहर आणि जिल्ह्यातून हद्दपार करण्यात आले आहे. मात्र त्याचा वावर शहरातच असल्याची माहिती पोलीसांना मिळाली होती. मंगळवारी (दि.१८) तो आपल्या घरी आला असल्याची माहिती मिळाली असता पोलीसांना छापा टाकून त्यास जेरबंद केले. पोलीस शिपाई कुंदन राठोड यांनी दिलेल्या तक्रारीवरून नशिकरोड पोलीस ठाण्यात गुन्हा दाखल करण्यात आला असून अधिक तपास पोलीस नाईक वटाने करीत आहेत.
…..
