नाशिक – चोरट्यांनी बांधकाम साईटवरील सीसीटिव्ही यंत्रणाच केली लंपास

बांधकाम साईटवरील सीसीटिव्ही यंत्रणा चोरी
नाशिक : सुरक्षेच्या दृष्टीने बांधकाम साईटवर बसविलेले सीसीटिव्ही यंत्रणा चोरट्यांनी चोरून नेल्याची घटना हनुमानवाडी भागात घडली. याप्रकरणी पंचवटी पोलीस ठाण्यात चोरीचा गुन्हा दाखल करण्यात आला आहे.
तुकाराम वामन कटाळे (रा.दत्तचौक,गंगापूररोड) यांनी याप्रकरणी तक्रार दाखल केली आहे. कटाळे यांची हनुमानवाडीतील जाधव कॉलनीत रेणूका हाईटस नावाच्या इमारतीचे बांधकाम सुरू आहेत. या बांधकावर सुरक्षेच्या दृष्टीने सीसीटिव्ही यंत्रणा बसविण्यात आली होती. सुमारे ३६ हजार रूपये किमतीची सदर यंत्रणा चोरट्यांनी चोरून नेली. अधिक तपास हवालदार माळोदे करीत आहेत.

….

बेकायदा दारू विक्री एकास अटक
नाशिक : बेकायदा देशी दारू विक्री करणा-या एकास पोलीसांनी बेड्या ठोकल्या. संशयीत वाल्मिकनगर भागात दारू विक्री करीत होता. त्याच्या ताब्यातून दारूचा साठा हस्तगत करण्यात आला असून याप्रकरणी पंचवटी पोलीस ठाण्यात गुन्हा दाखल करण्यात आला आहे.विक्रम सुरेश दळवी (३१ रा.समाज मंदिरासमोर,वाल्मिकनगर) असे अटक केलेल्या मद्यविक्रेत्याचे नाव आहे. रामप्रसाद दुकानापाठीमागे एक इसम बेकायदा देशी दारूची विक्री करीत असल्याची माहिती पोलीसांना मिळाली होती. त्यानुसार सोमवारी (दि.१७) पोलीसांनी छापा टाकला असता संशयीत देशी दारू विक्री करतांना मिळून आला. संशयीताच्या ताब्यातून २ हजार ८२० रूपये किमतीचा देशी दारूचा साठा जप्त करण्यात आला असून,याप्रकरणी पोलीस कर्मचारी नितीन जगताप यांनी दिलेल्या तक्रारीवरून गुन्हा दाखल करण्यात आला असून अधिक तपास पोलीस नाईक सानप करीत आहेत.

…..

सिडकोत दोघांची आत्महत्या
नाशिक : सिडको परिसरात वेगवेगळय़ा ठिकाणी राहणा-या दोघांनी आत्महत्या केली. त्यात ६० वर्षीय वृध्दासह ३२ वर्षीय तरूणाचा समावेश आहे. दोघांच्या आत्महत्येचे कारण समजू शकले नाही. याप्रकरणी अंबड पोलीस ठाण्यात मृत्युची नोंद करण्यात आली आहे.रमेश दशरथ अहिरे (६० रा.शिवशक्ती चौक,सिडको) या वृध्दाने रविवारी (दि.१६) रात्री अज्ञात कारणातून आपल्या राहत्या घरी विषारी औषध सेवन केले होते. ही बाब निदर्शनास येताच कुटूंबियांनी त्यांना जिल्हा रूग्णालयात दाखल केले होते. उपचार सुरू असतांना दुस-या दिवशी सोमवारी त्यांचा मृत्यु झाला अधिक तपास चव्हाण करीत आहेत. तर दत्तमंदिर बसस्टॉप भागात राहणा-या राजेंद्र गोपीचंद पाटील (३२) या युवकाने सोमवारी (दि.१७) दुपारच्या सुमारास आपल्या राहत्या घरात अज्ञात कारणातून लोखंडी अ‍ँगलला ओढणी बांधून गळफास लावून घेतला होता. त्यात त्याचा मृत्यु झाला. याप्रकरणी नामदेव पाटील यांनी दिलेल्या खबरीवरून पोलीस दप्तरी मृत्युची नोंद करण्यात आली असून अधिक तपास हवालदार राऊत करीत आहेत.