नाशिक : दुचाकीवरून प्रवास करणा-या महिलेच्या गळयातील सोनसाखळी भामट्यांनी ओरबाडून नेल्याची घटना गंगापूररोडवरील नरसिंहनगर भागात घडली. याप्रकरणी गंगापूर पोलीस ठाण्यात जबरीचोरीचा गुन्हा दाखल करण्यात आला आहे. मनिषा विजय दुग्गड (रा.पनवेल हल्ली राठी आमराई समोर) यांनी तक्रार दाखल केली आहे. दुग्गड या रविवारी (दि.२८) आपल्या बहिणीस मोपेड दुचाकीवर डबलसीट घेवून जात असतांना ही घटना घडली. दोघी बहिणी दत्त चौकाकडून नरसिंहनगरच्या दिशेने दुचाकीवर प्रवास करीत असतांना अथर्व मंगल कार्यालयासमोर पाठीमागून आलेल्या मोटारसायकलस्वाराने दुग्गड यांच्या गळय़ातील सुमारे ७५ हजार रूपये किमतीची सोनसाखळी हिसकावून नेली. अधिक तपास उपनिरीक्षक भिसे करीत आहेत.
