नाशिक – सीसीटिव्ही यंत्रणेची तोडफोड करुन कंपनीत चोरी
नाशिक : कारखाना आवारात लावलेल्या सीसीटिव्ही यंत्रणेचे नुकसान करीत भामट्यांनी कंपनीत चोरी केल्याचा प्रकार समोर आला असून, या घटनेत चोरट्यांनी सुमारे २५ हजाराच्या ऐवजावर डल्ला मारला. याप्रकरणी सातपूर पोलीस ठाण्यात चोरीचा गुन्हा दाखल करण्यात आला आहे. मंगेश गोपीनाथ काठे (रा.महात्मानगर) यांनी याप्रकरणी तक्रार दाखल केली आहे. काठे यांचा सकाळ पेपर उद्योग समुहाच्या पाठीमागे मायक्रो टेक सिस्टीम सर्व्हीसेस नावाचा कारखाना आहे. गुरूवारी (दि.२५) अज्ञात चोरट्यांनी कंपनी आवारात प्रवेश करून सीसीटिव्ही यंत्रणेचे नुकसान करून लोखंडी पाईप,सीडी आणि खिडक्यांचे अ‍ॅल्युमिनीअम चॅनल असा सुमारे २४ हजाराचा ऐवज चोरून नेला. अधिक तपास पोलीस नाईक गीते करीत आहेत.
२५ हजाराच्या ४१ अ‍ॅल्युमिनीअम प्लेटा चोरीला
नाशिक : नव्याने सुरू असलेल्या बांधकाम साईटच्या आवारातून चोरट्यांनी अ‍ॅल्युमिनीअम प्लेटा चोरून नेल्याची घटना पाथर्डी गाव चौफुली भागात घडली. याप्रकरणी इंदिरानगर पोलीस ठाण्यात चोरीचा गुन्हा दाखल करण्यात आला आहे. प्रविण हरिचंद्र गावीत (रा.सावतानगर,सिडको) यांनी तक्रार दाखल केली आहे. गावीत पाथर्डी सर्कल येथे सुरू असलेल्या इको प्रोजेक्ट या बांधकाम साईटचे काम बघतात. बुधवारी (दि.२४) इको प्रोजेक्ट या बांधकाम साईटच्या आवारात ठेवलेल्या सुमारे २५ हजार रूपये किमतीच्या ४१ अ‍ॅल्युमिनीअम प्लेटा चोरट्यांनी चोरून नेल्या. अधिक तपास पोलीस नाईक बरेलीकर करीत आहेत.
