नाशिक – वीज वितरण कंपनीच्या वायरमनला मारहाण, पितापुत्रास अटक

वायरमनला मारहाण पितापुत्रास अटक
नाशिक : शेतातील इलेक्ट्रीक पोल उभा करण्यासाठी गेलेल्या वायरमनसह ठेकेदाराच्या कामगारांना त्रिकुटाने बेदम मारहाण केल्याची घटना बेलतगव्हाण ता.जि.नाशिक येथे घडली. या घटनेत वायरमन जखमी झाला असून पोलीसांनी बापलेकास अटक केली आहे. याप्रकरणी देवळाली कॅम्प पोलीस ठाण्यात शाासकिय कामात अडथळा आणल्याप्रकरणी गुन्हा दाखल करण्यात आला आहे. शंकर कचरू आडके (५०) व संदिप कचरू आडके (२९ रा.दोघे नाणेगाव शिवार ता.जि.नाशिक) अशी अटक केलेल्या संशयीत बापलेकाचे नाव आहे. तर त्यांचा एक साथीदार अद्याप फरार आहे. याप्रकरणी वीज कंपनीच्या भगूर सेक्शन भागात कार्यरत असलेले कर्मचारी चंद्रकांत पोपट पाळदे (रा.बेलतगव्हाण) यांनी तक्रार दाखल केली आहे. गेल्या आठवड्यात वादळी पाऊसामुळे आडके मळयातील इलेक्ट्रीक पोल पडला होता. त्यामुळे पाळदे रविवारी (दि.१६) ठेकेदार पंडोरे याचे कामगार घेवून सदर ठिकाणी पोल उभा करण्यासाठी गेले असता ही घटना घडली. कामगारांकरवी वायरमन पाळदे पोल उभा करीत असतांना बापलेकांसह त्यांच्या समवेत आलेल्या एका नातेवाईकाने कोणाला विचारून पोल उभा केला असे म्हणत पाळदे यांच्यासह कामगारांना शिवीगाळ करीत मारहाण केली. यावेळी पाळदे यांच्या पाठीत दगड फेकून मारण्यात आला. तसेच सरकारी काम पूर्ण करू न देता कामात अडथळा आणला. अधिक तपास सहाय्यक निरीक्षक गिते करीत आहेत.

….

मारहाणीत दोघे जखमी एकास अटक
नाशिक : परिचितासह त्याच्या दोन साथीदारांनी दोघा मित्रांना बेदम मारहाण करून जखमी केल्याची घटना गोरक्षनगर भागात घडली. या प्रकरणी म्हसरूळ पोलीस ठाण्यात गुन्हा दाखल करण्यात आला असून,पोलीसांनी एका संशयीतास अटक केली आहे. संशयीतांपैकी दोघेही पोलीस रेकॉर्डवरील गुन्हेगार आहेत. आकाश दिलीप खैरनार (२४ रा.उमा रेसि.म्हसरूळ – मेरी लिंकरोड), रोहित गांगुर्डे (रा.फुलेनगर ) व त्यांचा अनोळखी साथीदार अशी संशयीतांची नावे असून आकाश खैरनार यास पोलीसांनी ताब्यात घेतले आहे. आकाश भाऊसाहेब वाघचौरे (२३ रा.लक्ष्मणनगर,तेलंगवाडी) यांनी याप्रकरणी तक्रार दाखल केली आहे.वाघमारे व त्याचा मित्र सुनिल महाले शनिवारी (दि.१६) रात्री मनपा गार्डन जवळील योगचिंतन सोसायटी समोर टेम्पोमधून वांग्यांने भरलेले कॅरेट उतरवित असतांना ही घटना घडली. दोघे मित्र काम करीत असतांना परिचीत आकाश खैरनार व त्याचे साथीदार तेथे आले. कुठलेही कारण नसतांना त्यांनी दोघा मित्रांना शिवीगाळ करीत लाथाबुक्यांनी मारहाण केली. यावेळी रोहित गांगुर्डे नामक तरूणाने दोघा मित्रांच्या डोक्यात काही तरी वजनी लोखंडी मारल्याने दोघा मित्रांचे डोके फुटले असून अधिक तपास हवालदार रोकडे करीत आहेत.