नाशिक – त्रिमुर्ती चौकात २७ हजाराची घरफोडी

त्रिमुर्ती चौकात २७ हजाराची घरफोडी
नाशिक : सिडकोतील त्रिमुर्तीचौकात झालेल्या घरफोडीत चोरट्यांनी २७ हजाराचा ऐवज चोरून नेला. त्यात लॅपटॉप,मोबाईल,मुलांचा गल्ला व पर्स आदींचा समावेश आहे. याप्रकरणी अंबड पोलीस ठाण्यात घरफोडीचा गुन्हा दाखल करण्यात आला आहे.कृष्णा रामदास केदारे (रा.फ्रेशअप बेकरीजवळ,त्रिमुर्ती चौक) यांनी तक्रार दाखल केली आहे. केदारे कुटुंबिय बाहेर गावी गेले असता अज्ञात चोरट्यांनी दि.१२ ते १६ मे दरम्यान घराचा पाठीमागील दरवाजा तोडून घरातील दोन लॅपटॉप,मोबाईल,गॅस शेगडी,मुलांचा गल्ला आाणि कागदपत्र असलेली पर्स असा सुमारे २७ हजाराचा ऐवज चोरून नेला. अधिक तपास उपनिरीक्षक पावरा करीत आहेत.

…….

हल्लेखोराने घेतला चावा
नाशिक : भावावर हल्ला करून पळणा-यास पकडण्यासाठी गेलेल्या एकावर धारदार शस्त्राने वार करीत हल्लेखोराने चावा घेतल्याची घटना शरणपूरोड भागात घडली. पोलीसांनी संशयीतास बेड्या ठोकल्या असून याप्रकरणी सरकारवाडा पोलीस ठाण्यात गुन्हा दाखल करण्यात आला आहे. विजय रॉबर्ट मारी (४९ रा.बेथेलेनगर,शरणपूररोड) असे अटक केलेल्या संशयीताचे नाव आहे. मुकेश मधुकर वाघमारे (३४ रा.सदर) यांनी याप्रकरणी तक्रार दाखल केली आहे. संशयीत आणि तक्रारदार एकाच भागातील रहिवासी असून किरकोळ वादातून संशयीत विजय याने आपला मोठा भाऊ संजय याच्या डोक्यात लोखंडी रॉड मारून पळत असतांना ही घटना घडली. वाघमारे शनिवारी (दि.१५) रात्री दवाखान्यातील सेवा बजावून घराकडे परतत असतांना पळत सुटलेल्या संशयीतामागे त्याचे आई वडील पकडण्यासाठी धावत होते. वाघमारे यांनी घटनेचे गांभीर्य ओळखून विजय मारी यास पकडले असता त्याने वाघमारे यांच्यावर धारदार शस्त्राने वार करून त्यांच्या पाठीस चावा घेतला. या घटनेत वाघमारे जखमी झाले असून पोलीसांनी संशयीतास बेड्या ठोकल्या आहेत. अधिक तपास हवालदार गावित करीत आहेत.

……

पवननगरला एकाची आत्महत्या
नाशिक : सिडकोतील पवननगर भागात राहणा-या ५० वर्षीय इसमाने गळफास लावून आत्महत्या केली. सदर व्यक्तीच्या आत्महत्येचे कारण समजू शकले नाही. याप्रकरणी अंबड पोलीस ठाण्यात मृत्युची नोंद करण्यात आली आहे. यशवंत दगा देवरे (रा.भगतसिंग चौक,लोकमान्यनगर) असे आत्महत्या करणा-या व्यक्तीचे नाव आहे. देवरे यांनी रविवारी (दि.१६) दुपारच्या सुमारास अज्ञात कारणातून आपल्या राहत्या घरात पंख्यास दोरी बांधून गळफास लावून घेतला होता. त्यात त्यांचा मृत्यु झाला. याबाबत शोजारी गोकुळ वडनेरे यांनी दिलेल्या खबरीवरून अंबड पोलीस ठाण्यात मृत्युची नोंद करण्यात आली असून अधिक तपास पोलीस नाईक परदेशी करीत आहेत.