नाशिक – पाथर्डी फाटा भागात तडीपार गुंडास पोलीसांनी ठोकल्या बेड्या

तडीपार गुंड जेरबंद
नाशिक : गुन्हेगारी कारवायांमुळे हद्दपारी कारवाई केलेली असतांना शहरात वावर ठेवणा-या तडीपार गुंडास पोलीसांनी बेड्या ठोकल्या. संशयीत पाथर्डी फाटा भागात मिळून आला. याप्रकरणी अंबड पोलीस ठाण्यात गुन्हा दाखल करण्यात आला आहे.अक्षय उत्तम जाधव (२४ रा.साई दर्शन अपा.दत्तनगर) असे अटक केलेल्या तडीपाराचे नाव आहे. अक्षय जाधव याच्या गुन्हेगारी कारवायांमुळे त्यास शहर पोलीसांनी सहा महिन्यांच्या कालावधीसाठी शहर आणि जिह्यातून हद्दपार केले आहे. मात्र त्याचा वावर शहरातच असल्याची माहिती अंबड पोलीसांना मिळाली होती. शुक्रवारी (दि.१४) रात्री तो पाथर्डी फाटा परिसरात येणार असल्याची माहिती मिळाल्याने पोलीसांनी सापळा लावला असता तो शिवाजी पुतळा भागात पोलीसांच्या जाळयात अडकला. याप्रकरणी पोलीस कर्मचारी मुकेश गांगुर्डे यांनी दिलेल्या तक्रारीवरून गुन्हा दाखल करण्यात आला असून अधिक तपास पोलीस नाईक गायकवाड करीत आहेत.

…..

पाथर्डी गावात तरूणाची आत्महत्या
नाशिक : शेजा-याच्या घरी झोपण्यासाठी गेलेल्या तरूणाने गळफास लावून आत्महत्या केल्याची घटना पाथर्डी गावात घडली. सदर युवकाच्या आत्महत्येचे कारण समजू शकले नाही. याप्रकरणी इंदिरानगर पोलीस ठाण्यात मृत्युची नोंद करण्यात आली आहे. रोहित निलेश पवार (२३ रा.आहिल्यानगर) असे आत्महत्या करणा-या युवकाचे नाव आहे. रोहित पवार शुक्रवारी (दि.१४) दुपारच्या सुमारास शेजाºयांच्या घरात झोपण्यासाठी गेला होता. घरात कुणी नसल्याने त्याने अज्ञात कारणातून छताच्या लोखंडी पाईपाला ओढणी बांधून गळफास लावून घेतला त्यात त्याचा मृत्यु झाला. वडिल निलेश पवार यांनी दिलेल्या खबरीवरून मृत्युची नोंद करण्यात आली असून अधिक तपास हवालदार खांडेकर करीत आहेत.
….