नाशिक – वाद मिटविण्यासाठी गेलेल्या अल्पवयीन मुलावर चाकू हल्ला

अल्पवयीन मुलावर चाकू हल्ला
नाशिक : वाद मिटविण्यासाठी गेलेल्या अल्पवयीन मुलावर दोघांनी चाकू हल्ला केल्याची घटना द्वारका परिसरातील डॉ.बाबासाहेब आंबेडकर उद्यानात घडली. याप्रकरणी भद्रकाली पोलीस ठाण्यात गुन्हा दाखल करण्यात आला आहे.
गौरव नरेंद्र काथवटे (१७ रा.सावरकरचौक,भोई गल्ली) याने याप्रकरणी तक्रार दाखल केली आहे. गौरव काथवटे व त्याचा मामाचा मुलगा शुक्रवारी (दि.१४) सकाळच्या सुमारास झाकीर हुसेन हॉस्पिटल परिसरातील डॉ.बाबासाहेब आंबेडकर उद्यानात गेले असता ही घटना घडली. दोघे जण उद्यानात गप्पा मारत बसलेले असतांना अनोळखी दोघांनी त्यांना गाठले. यावेळी दोघा संशयीतांनी मामाच्या मुलाशी मागील भांडणाची कुरापत काढून त्यास मारहाण केली. याप्रसंगी गौरव त्याच्या मदतीस धावून गेला असता संशयीतांपैकी एकाने धारदार सु-याने त्याच्या हातावर वार केले. या घटनेत गौरव जखमी झाला असून अधिक तपास जमादार भालेराव करीत आहेत.

……

शेजा-याकडून चाकू हल्ला
नाशिक : किरकोळ कारणातून शेजा-यावर चाकू हल्ला करण्यात आल्याची घटना पाथर्डी शिवारात घडली. या घटनेत ५० वर्षीय इसम जखमी झाला असून याप्रकरणी इंदिरानगर पोलीस ठाण्यात दांम्पत्याविरूध्द गुन्हा दाखल करण्यात आला आहे.सागर चव्हाणके (४०) व प्राजक्ता चव्हाणके (३८) अशी संशयीतांची नावे असून याप्रकरणी वृषाली प्रकाश देसले (४१ रा.श्रीगणेश अपा.पाथर्डी शिवार) यांनी तक्रार दाखल केली आहे. संशयीत आणि तक्रारदार या एकाच सोसायटीत राहणारे एकमेकांचे शेजारी आहेत. देसले आणि चव्हाणके कुटूंबियात खटके उडू लागल्याने देसले कुटूंबियांनी संशयीत दांम्पत्याशी बोलणे टाळले आहे. याच कारणातून हा चाकू हल्ला झाला. वृषाली व प्रकाश देसले हे दांम्पत्य गुरूवारी (दि.१३) सायंकाळी आपल्या मुलांना घेवून सोसायटीच्या आवारात वॉकिंग करीत असतांना ही घटना घडली. शेजारी कुटूंबियांनी अचानक बोलणे बंद केल्याने संशयीत चव्हाणके दांम्पत्याने देसले कुटूंबियास गाठून याबाबत जाब विचारला. यावेळी संतप्त चव्हाणके याने शिवीगाळ व मारहाण करीत प्रकाश देसले यांच्या पोटावर चाकूने वार करून दुखापत केली. अधिक तपास उपनिरीक्षक जगदाळे करीत आहेत.

…..

मोबाईल व सोन्याची पोत लांबविली
नाशिक : बेडरूमच्या खिडकीत हात घालून चोरट्यांनी सोन्याची पोत आणि मोबाईल असा सुमारे ९३ हजाराचा ऐवज लांबविला. ही घटना सामनगाव रोडवरील भोरमळा भागात घडली. याप्रकरणी नाशिकरोड पोलीस ठाण्यात चोरीचा गुन्हा दाखल करण्यात आला आहे. प्राजक्ता अजित भोर (रा,मातोश्री बंगला,ओमसाई लॉन्स जवळ) यांनी याप्रकरणी तक्रार दाखल केली आहे. मंगळवारी (दि.११) रात्री ही घटना घडली. भोर कुटूंबिय आपल्या घरात असतांना अज्ञात चोरट्यांनी बंगल्याच्या आवारात शिरून बेडरूमच्या खिडकीत हात घालून साडे तीन तोळे वजनाची सोन्याची पोत आणि आवारातील चोपाळयावर ठेवलेला मोबाईल असा सुमारे ९२ हजार ५०० रूपये किमतीचा ऐवज चोरून नेला. अधिक तपास हवालदार चिखले करीत आहेत.