नाशिक – विवाहीतेची आत्महत्या, सासरच्या सहा जणांविरुध्द गुन्हा दाखल

विवाहीतेची आत्महत्या सासरच्या मंडळीवर गुन्हा
नाशिक : चारित्र्याच्या संशयासह पोल्ट्री फार्म टाकण्यासाठी माहेरून ५० हजार रूपये आणावेत या मागणीसाठी विवाहीतेचा छळ करून तिला आत्महत्येस प्रवृत्त केल्याप्रकरणी सासरच्या सहा जणांविरूध्द गुन्हा दाखल करण्यात आला आहे. महिलेच्या भावाने दिलेल्या तक्रारीवरून आडगाव पोलीस ठाण्यात हा गुन्हा दाखल करण्यात आला आहे. सुनिल कु-हाडे, नाना कु-हाडे, सवडूबाई कु-हाडे,अनिल कु-हाडे,चंद्रकला गायकवाड ,शाकिला शिंदे (रा.जनार्दनस्वामी नगर,नांदूरनाका) अशी संशयीतांची नावे आहेत. पोलीसांनी दिलेल्या माहितीनुसार रोहिणी कु-हाडे या २४ वर्षीय विवाहीतेने मंगळवारी (दि.११) आपल्या घरी गळफास लावून आत्महत्या केली. महिलेच्या भावाने दिलेल्या तक्रारीनुसार हा गुन्हा दाखल करण्यात आला असून तक्रारीत लग्नानंतर सासरच्या मंडळीने किरकोळ कारणातून मानसिक व शाारिरीक छळ केल्याचे म्हटले आहे. तसेच चारित्र्याच्या संशयासह पोल्ट्री फॉर्म टाकण्यासाठी माहेरून ५० हजार रूपये आणावेत या मागणीवरून मारहाणीत तिचा दोन वेळा गर्भपात झाल्याचा आरोप करण्यात आला आहे. अधिक तपास सहाय्यक निरीक्षक बिडकर करीत आहेत.

…..

डम्परच्या धडकेत टेम्पो चालक ठार
नाशिक : भरधाव डंम्परने दिलेल्या धडकेत मालवाहू टेम्पो चालक ठार झाला. या अपघातात अन्य एक जण जखमी झाला असून हा अपघात भगूर पांढूर्ली मार्गावर झाला. याप्रकरणी देवळाली कॅम्प पोलीस ठाण्यात अपघाताचा गुन्हा दाखल करण्यात आला आहे. गोकुळ विजय कोठुरकर (२८ रा.मुळ सिन्नर,हल्ली राहूरी – विंचूर दळवी)असे मृत मालवाहू टेम्पो चालकाचे नाव आहे. या अपघातात निखील जाधव नामक तरूण जखमी झाला आहे. चालक जखमीचे नात्याने मेव्हणे आहेत. शालक आाणि मेव्हणा सोमवारी (दि.१०) दुपारच्या सुमारास भगूर येथून विंचूर दळवीच्या दिशेने मारूती सुझूकी सुपर कॅरी (एमएच १५ जीव्ही ८६०८) या मालवाहू टेम्पोतून प्रवास करीत असतांना हा अपघात झाला. राहूरी शिवारातील रमेश पानसरे यांच्या पोल्ट्री फॉर्म परिसरात पांढर्लीकडून भगुरच्या दिशेने भरधाव जाणा-या डम्परने एमएच १८ एए १०२६ टेम्पोस धडक दिली. या अपघातात दोघे साले मेव्हणे गंभीर जखमी झाले होते. त्यातील चालक कोठुरकर यांचा मृत्यु झाला असून निखील जाधव जखमी आहेत. याप्रकरणी मृताच्या सासरे संतोष भागवत (रा.राहूरी विंचूर दळवी) यांनी दिलेल्या तक्रारीवरून डम्परचालक संजय हनुमंता साळुखे (रा.चारणवाडी,दे.कॅम्प) याच्याविरूध्द गुन्हा दाखल करण्यात आाला असून अधिक तपास सहाय्यक निरीक्षक मोरे करीत आहेत.