सोसायटीच्या पार्किंगमधून सायकलींची चोरी
नाशिक : सोसायटीच्या पार्किंगमध्ये लावलेल्या चार सायकली चोरट्यांनी चोरून नेल्याची घटना तिडके कॉलनीत घडली. याप्रकरणी मुंबईनाका पोलीस ठाण्यात चोरीचा गुन्हा दाखल करण्यात आला आहे.
विजय मुलचंद पिचा (रा.लंबोधर अव्हेन्यू,पुष्पांजलीनगर) यांनी याप्रकरणी तक्रार दाखल केली आहे. लंबोधर अव्हेन्यू या सोसायटीतील सदस्यांच्या सायकली गेल्या शुक्रवारी (दि.७) सोसायटीच्या पार्किंगमध्ये लावलेल्या असतांना त्यातील सुमारे ५५ हजार रूपये किमतीच्या चार सायकली चोरट्यांनी चोरून नेल्या.अधिक तपास हवालदार शिंदे करीत आहेत.
….
दोघा भावांना मारहाण
नाशिक : दारू सेवन करण्याच्या कारणातून चार जणांनी दोघा भावांना बेदम मारहाण केल्याची घटना पारिजात नगर भागात घडली. याप्रकरणी गंगापूर पोलीस ठाण्यात परस्परविरोधी गुन्हा दाखल करण्यात आले आहे. या प्रकरणात पोलीसांनी दोन्ही गटातील सहा जणांना अटक केली आहे. त्यातील तीन जण जखमी झाले असून त्यांच्यावर उपचार सुरू आहेत.
पोलीसांनी दिलेल्या माहितीनुसार नयन दत्तात्रेय काळे (रा.कॉलेजरोड) या युवकाने दिलेल्या माहितीनुसार टिल्या उर्फ नरेंद्र प्रकाश जैत (शिवाजी चौक,जुने नाशिक),विशाल चंद्रभान इल्हे,अजय दशरथ धगाटे व गणेश हरी चौधरी (रा.खडकाळी,गंजमाळ) आदींनी रविवारी (दि.९) नयन व अनुप काळे (२४) या दोघा भावांना पारिजातनगर येथील साई दर्शन सोसायटीत बोलावून घेत बेदम मारहाण केली. या घटनेत लोखंडी पाईप आणि ट्यूब लाईटचा वापर करण्यात आल्याने अनुप काळे जखमी झाला असून त्याच्यावर उपचार सुरू आहेत. तर तर याच वादातून दोघा भावांनी विनयभंग केल्याची तक्रार तरूणीने दिली आहे. काळे बंधू पीडितेच्या भावाचे मित्र असून ते भावास मद्यपान करण्यास भाग पाडीत असल्याच्या कारणातून त्यांना घरी बोलावून घेत नातेवाईकांकरवी बेदम मारहाण केल्याचे बोलले जात आहे. या घटनेत अन्य दोघेही जखमी झाले असून पोलीसांनी दोन्ही गटातील सहा जणांना अटक केली आहे. अधिक तपास उपनिरीक्षक चेतन परदेशी करीत आहेत.
