नाशिक – कार आडवी लावून अपहरण व बेदम मारहाण, महिनाभराने तक्रार दाखल

अपहरण करून बेदम मारहाण
नाशिकः कार आडवी लावून अपहरण करत एकास बेदम मारहाण करून सोडून दिल्याचा प्रकार पंचवटीतील दहावा मैल येथे ९ एप्रिलला घडला होता. या प्रकरणी महिनाभराने शनिवारी तक्रार दाखल करण्यात आली आहे.
या प्रकरणी किरण भिला पाटील (रा. वक्रतुंडनगर दिंडोरी रोड, हल्ली अंमळनेर, जि. जळगाव) यांनी तक्रार दाखल केली आहे. त्यानुसार ९ एप्रिल रोजी पाटील हे नाशिकवरून धुळे येथे जाण्यासाठी खासगी वाहनातून प्रवास करत असताना रासबिहारी शाळेजवळ मारूती ८०० या गाडीतून आलेल्या चौघांनी चारचाकी आडवी लावून दोघांनी पाटील यांना खासगी वाहनातून बळजबरी उतरवून त्यांच्या चारचाकी गाडीत बसवले. त्या ठिकाणावरून त्यांचे अपहरण करून जानोरी जवळ घेऊन गेले. या ठिकाणी शिवीगाळ करत त्यांना लोखंडी रॉडने मारहाण करून त्यांचे पाय फॅक्चर करण्यात आले. तसेच त्यांना तेथेच टाकून संशयितांनी पलायन केले. याप्रकरणी पंचवटी पोलीस ठाण्यात गुन्हा दाखल करण्यात आला आहे. अधिक तपास उपनिरिक्षक एस. जी. पवार करत आहेत.

……

दुचाकी अपघतात एक ठार
नाशिकः रस्त्यात उभ्या असलेल्या वाहनावर दुचाकी आदळून झालेल्या अपघातात गंभीर जखमी झालेल्या वृद्याचा उपचारा दरम्यान मृत्यू झाल्याची घटना शुक्रवारी (दि.७) रात्री नाशिकरोड परिसरात घडली.
अरूण जगन्नाथ क्षत्रिय (६५,रा. अंधशाळा बसस्टॉप, नाशिकरोड) असे या घटनेत मृत्यू झोलेल्या व्यक्तीचे नाव आहे. पोलीसांनी दिलेल्या माहितीनुसार क्षत्रिय हे शुक्रवारी रात्री त्यांच्या दुचाकीने जात असताना खर्जुलमळा येथे रस्त्यात उभ्या असलेल्या वाहनावर दुचाकी आदळून ते गंभीर जखमी झाले. त्यांना उपचरासाठी जिल्हा शासकीय रूग्णालयात दाखल केले होते. उपचारादरम्यान त्यांचा मृत्यू झाला. याप्रकरणी नाशिकरोड पोलीस ठाण्यात नोंद करण्यात आली आहे.

शेतीच्या वादातून मारहाण
नाशिकः शेतीच्या जुन्या भांडणाच्या कारणातून तिघांनी महिलेसह दोघांना मारहाण केल्याची घटना गोरेवाडी येथील नाशिककर मळ्यात शुक्रवारी (दि.७) सकाळी घडली. प्रमोद निवृत्ती जाधव, राहुल निवृत्ती जाधव, शुभम जाधव (सर्व रा. गोरेवाडी, नाशिककर मळा) अशी मारहाण करणार्‍यांची नावे आहेत. या प्रकरणी सोमनाथ चिमनराव जाधव यांनी तक्रार दाखल केली आहे. त्यानुसार सोमनाथ जाधव यांच्या पत्नी शेतातील सामाईक विहिरीवर पाणी पाहण्यासाठी गेल्या असताना संशयितांनी त्यांना शिवीगाळ केली. मुलगा शिवराज च सोमनाथ हे तेथे आले असता त्यांना लोखंडी रॉडने बेदम मारहाण करण्यात आली. याप्रकरणी नाशिकरोड पोलीस ठाण्यात गुन्हा दाखल करण्यात आला आहे.

युवतीची आत्महत्या
नाशिकः राहते घरी विषारी औषध सेवन करून युवतीने आत्महत्या केल्याची घटना सातपुर कॉलनी परिसरात शुक्रवारी (दि.७) रात्री घडली. वैष्णवी अनिल मदनर (२१, रा. स्वराज्य चौक, सातपुर कॉलनी, सातपूर) असे आत्महत्या करणार्‍या युवतीचे नाव आहे. पोलीसांनी दिलेल्या माहितीनुसार वैष्णवी हीने राहते घरी विषारी औषध सेवन केले. ही बाब कुटुंबियांच्या निदर्शनास येताच तीला तातडीने खासगी रूग्णालयात दाखल केले. परंतु तत्पुर्वीच तीचा मृत्यू झाल्याचे डॉक्टरांनी तपासून घोषीत केले. याप्रकरणी सातपूर पोलीसांत नोंद करण्यात आली आहे.