वडाळारोडला कुटूंबिय घरात नसल्याची संधी साधत चोरट्यांनी केली घरफोडी
नाशिक : कुटूंबिय घरात नसल्याची संधी साधत चोरट्यांनी घरफोडी करून सुमारे ५७ हजाराचा ऐवज चोरून नेला. त्यात सोन्याचांदीच्या दागिण्यांचा समावेश आहे. ही घटना वडाळारोड भागात घडली. याप्रकरणी मुंबईनाका पोलीस ठाण्यात गुन्हा दाखल करण्यात आला आहे. नदिम रशीद शेख (रा.भक्तीनगर अपा. साहिल लॉन्स मागे) यांनी याप्रकरणी तक्रार दाखल केली आहे. शेख कुटूंबिय रविवारी (दि.५) व्यापारानिमित्त बाहेर गावी गेले असता ही घटना घडली. अज्ञात चोरट्यांनी त्यांच्या बंद घराचा कडीकोयंडा तोडून लाकडी कपाटातील सुमारे ५६ हजार ७०० रूपये किमतीचे अलंकार चोरून नेले.
वृध्देची पोत खेचली
नाशिक : रस्त्याने पायी जाणा-या ७३ वर्षीय वृध्देच्या गळ्यातील सोनसाखळी आणि सोन्याची पोत दुचाकीस्वार भामट्यांनी ओरबाडून नेल्याची घटना कोनार्क नगर भागात घडली. याप्रकरणी आडगाव पोलीस ठाण्यात जबरीचोरीचा गुन्हा दाखल करण्यात आला आहे. शालन अशोक कसोटे (रा.दत्तमंदिरामागे,कोनार्क नगर) यांनी याप्रकरणी तक्रार दाखल केली आहे. कसोटे या मंगळवारी (दि.७) फेरफटका मारण्यासाठी घराबाहेर पडल्या होत्या. जत्रा हॉटेल कडून त्या सयाजी पॅलेसच्या दिशेने पायी जात असतांना ही घटना घडली. शांतीनाथ मार्बल दुकानासमोरून त्या पायी जात असतांना पाठीमागून आलेल्या दुचाकीस्वाराने यु टर्न घेत दोघांपैकी एकाने त्यांच्या गळय़ातील सोनसाखळी आणि सोन्याची पोत असा सुमारे ७५ हजाराचे दागिणे ओरबाडून नेले. अधिक तपास उपनिरीक्षक जाधव करीत आहेत.
