रिक्षाचालकाने केली वाहतूक पोलीसाला मारहाण, आरोपी गजाआड
नाशिक – द्वारका जवळील बेला पेट्रोलपंपासमोर शनिवारी रिक्षाचालक रिंकेश गणेश सोळंकी (२२, रा. म्हसरूळ) याने वाहतूक पोलिस नंदू भागवत गवळी यांना शिवीगाळ करत मारहाण केली. रिक्षातील टेपचा आवाज कमी करण्यास सांगितल्यानंतर रिक्षाचालकाने ही मारहाण केली. मारहाण करतांना रिक्षाचालकने वाहतूक पोलिसाची वर्दी पकडली. त्यानंतर त्याने दगडफेकही केली. फेकलेल्या दगडामुळे गवळी यांच्या छातीलाही मार बसला आहे. या प्रकरणी मुंबई नाका पोलिसांनी सरकारी कामात अडथळा आणल्याप्रकरणी गुन्हा दाखल करुन रिक्षाचालकास गजाआड करण्यात आले आहे. या घटनेचा पुढील तपास सहायक पोलिस निरीक्षक सोमनाथ गेंगजे करत आहेत.
—
पायी जाणाऱ्या वृद्धाच्या डोक्यावर दगड मारल्याची घटना
नाशिक – गंगापूररोडवरील व्हीपीज हॉटेलच्या समोर रस्त्याने पायी जाणाऱ्या वृद्धाच्या डोक्यावर दगड मारून दुचाकीस्वारांनी जखमी केल्याची घटना घडली आहे. या प्रकरणी दशरथ हरिभाऊ मंडलीक (५८, रा. मंडलीकमळा, आनंदवली) यांनी तक्रार दाखल केली आहे. मंडलीक रस्त्याच्या बाजुने जात असताना मोपेडवर दोन जण आले. एकाने आपल्या हातातील दगड भरधाव वेगात मंडलीक यांच्या डोक्यावर मारला. यात मंडलीक गंभीर जखमी झालेत. या प्रकरणी गंगापूर पोलिसांनी गुन्हा दाखल केला असून, पुढील तपास हवालदार पी. जी. भूमकर करीत आहेत.
—
सातपूरला चोरी, ४८ हजाराचा एेवज लंपास
नाशिक – सातपूर भागातील श्रमीकनगर येथील दीप आनंद अपार्टंमेंटमध्ये चोरीची घटना घडली आहे. चोरट्यांनी लॉक तोडून कपाटात ठेवलेले सोन्याचा हार, पायातील चांदीची पायल व साखळी, तसेच मंगळसूत्र असा ४८ हजार ३०० रूपयांचा एेवज लंपास केला आहे. बणवारीलाल ब्रीजकिशोर पांडे (६३) यांच्या घरी ही चोरीची घटना घडली. सातपूर पोलिसांनी या प्रकरणी गुन्हा दाखल केला असून, पुढील तपास सहायक पोलिस निरीक्षक गिते करीत आहेत.
नाशिक – रिक्षाचालकाने केली वाहतूक पोलीसाला मारहाण, आरोपी गजाआड
