सिडकोत महिलांचा विनयभंग
नाशिक : फेरफटका मारण्यासाठी घराबाहेर पडलेल्या दोन महिलांचा एकाने विनयभंग केल्याची घटना सिडकोतील सिम्बॉयसिस कॉलेज भागात घडली. अश्लिल हावभाव करीत संशयीताने विनयभंग केला असून याप्रकरणी अंबड पोलीस ठाण्यात गुन्हा दाखल करण्यात आला आहे. चुलत बहिणी असलेल्या पीडित महिलांनी दिलेल्या तक्रारीत म्हटले आहे की, गुरूवारी (दि.१५) दोघी बहिणी फेरफटका मारण्यासाठी घराबाहेर पडल्या होत्या. सिम्बॉयसिस कॉलेज ते एसव्हीसी बँकेसमोरून महिला पाथर्डी फाट्याच्या दिशेने पायी जात असतांना पाठीमागून पळत आलेल्या ३० ते ३५ वयोगटातील इसमाने विनयभंग केला. पांढरा टी शर्ट व बरमुडा पॅण्ट परिधान करून पाठीमागून पळत आलेल्या संशयीताने महिलासमोर जावून अश्लिल वर्तन केले. अधिक तपास सहाय्यक निरीक्षक बेडवाल करीत आहेत.
….
तडीपार छकुल्या वाघमारे जेरबंद
नाशिक : शहर आणि जिह्यातून दोन वर्षासाठी हद्दपार केलेले असतांना शहरात वावर ठेवणा-या तडीपारास पोलीसांनी जेरबंद केले. याप्रकरणी नाशिकरोड पोलीस ठाण्यात गुन्हा दाखल करण्यात आला आहे. गणेश उर्फ छकुल्या मधुकर वाघमारे (१९ रा.म्हसोबा मंदिराजवळ,एकलहरारोड) असे अटक केलेल्या संशयीत तडीपाराचे नाव आहे. वाघमारे यास गेल्या वर्षी गुन्हेगारी कारवायांमुळे शहर व जिह्यातून हद्दपार करण्यात आले आहे. मात्र त्याचा वावर शहरातच असल्याची माहिती पोलीसांना मिळाली होती. पोलीस त्याच्या मागावर असतांनाच पोलीस नाईक संदिप बागुल यांना मिळालेल्या माहितीवरून ही कारवाई करण्यात आली. गणेश उर्फ छकुल्या गुरूवारी (दि.१५) जुना ओढा रोडवरील विठ्ठल मंदिर परिसरात येणार असल्याच्या माहितीवरून सापळा लावला असता तो पोलीसांच्या जाळयात अडकला. अधिक तपास हवालदार साबळे करीत आहेत.
