नाशिक – गॅलरीतून पडल्याने अल्पवयीन मुलीचा मृत्यु

गॅलरीतून पडल्याने अल्पवयीन मुलीचा मृत्यु
नाशिक : चौथ्यामजल्यावरील गॅलरीतून पडल्याने १४ वर्षीय मुलीचा मृत्यु झाला. ही घटना सदाशिवनगर भागात घडली होती. गेली पंधरा दिवस सदर मुलगी मृत्युशी झुंज देत होती. याप्रकरणी अंबड पोलीस ठाण्यात मृत्युची नोंद करण्यात आली आहे. ऋतुजा किरणकुमार खंडारे (रा.जनक प्राईड,सदाशिवनगर) असे इमारतीच्या चौथ्या मजल्यावरून पडल्याने मृत्यु झालेल्या मुलीचे नाव आहे. ऋतुजा गेल्या गुरूवारी (दि.१) चौथ्या मजल्यावरील आपल्या घराच्या गच्चीतून तोल जावून पडली होती. या घटनेत गंभीर जखमी झाल्याने कुटुंबियांनी तिला मुंबईनाका भागातील नारायणी हेल्थ केअर या हॉस्पिटल मध्ये दाखल केले होते. गेली पंधरा दिवस तिच्यावर उपचार सुरू असतांना तिचा मृत्यु झाला. अधिक तपास पोलीस नाईक परदेशी करीत आहेत.

….

चक्कर येवून पडल्याने तरूणाचा मृत्यु
नाशिक : महापालिकेच्या दवाखान्यासमोर चक्कर येवून पडल्याने ३५ वर्षीय अनोळखी तरूणाचा मृत्यु झाला. ही घटना महाराष्ट्र हौसिंग कॉलनी भागात घडली. सदर तरूणाची अद्याप ओळख पटू शकली नाही. याप्रकरणी सातपूर पोलीस ठाण्यात मृत्युची नोंद करण्यात आली आहे. ३५ वर्षीय अनोळखी तरूण गुरूवारी (दि.१५) दुपारच्या सुमारास महाराष्ट्र हौसिंग कॉलनीतील मनपाच्या हॉस्पिटल भागात आला होता. प्रवेशद्वारासमोरच अचानक चक्कर येवून पडल्याने त्यास तातडीने रूग्णालयात दाखल करण्यात आले मात्र उपचारापूर्वी वैद्यकीय सुत्रांनी त्यास मृत घोषीत केले. अधिक तपास हवालदार पाटील करीत आहेत.
…