नाशिक – रात्रपाळीसाठी कामावर आलेल्या कामगाराने कारखान्यातच गळफास लावून केली आत्महत्या

कारखान्यात कामगाराची आत्महत्या
नाशिक : रात्रपाळीसाठी कामावर आलेल्या कामगाराने कारखान्यातच गळफास लावून आत्महत्या केल्याची घटना औद्योगीक वसाहतीत घडली. सदर कामगाराच्या आत्महत्येचे कारण स्पष्ट झाले नाही. याप्रकरणी अंबड पोलीस ठाण्यात मृत्युची नोंद करण्यात आली आहे. शशिकांत संतू उनवणे (५५ रा.प्रशांतनगर,पाथर्डी फाटा) असे आत्महत्या करणा-या कामगाराचे नाव आहे. उनवणे औद्योगिक वसाहतीतील विर इलेक्ट्रो इंजिनिअरींग प्रा.लि. या कारखान्यात नोकरीस होते. मंगळवारी (दि.१३) रात्री ते कामावर आले होते. मध्यरात्री अज्ञात कारणातून त्यांनी कारखान्यातच गळफास लावून घेत आत्महत्या केली. व्यवस्थापनाने दिलेल्या खबरीवरून पोलीस दप्तरी मृत्युची नोंद करण्यात आली असून अधिक तपास हवालदार टोपले करीत आहेत.

…..

उघड्या घरातून मोबाईल चोरी
नाशिक : उघड्या घरात शिरून चोरट्यांनी मोबाईल चोरून नेल्याची घटना औद्योगीक वसाहतीतील शिवाजीनगर भागात घडली. याप्रकरणी गंगापूर पोलीस ठाण्यात चोरीचा गुन्हा दाखल करण्यात आला आहे. मच्छिंद्र प्रकाश पारखे (रा.अशोकनगर,सातपूर) या युवकाने याप्रकरणी तक्रार दाखल केली आहे. पारखे २३ जून रोजी शिवाजीनगर भागात राहणा-या आपल्या मित्राच्या घरी गेला होता. मोबाईल चार्जिंगला लावून दोघे मित्र बेडरूममध्ये गप्पा मारत बसले असतांना ही घटना घडली. अज्ञात चोरट्यांनी उघड्या घरात प्रवेश करून चार्जिंगला लावलेला मोबाईल चोरून नेला. अधिक तपास हवालदार भडींगे करीत आहेत.