नाशिक – विविध योजनांचे आमिष दाखवून नोकरदार महिलेस साडे सात लाखांचा गंडा

नोकरदार महिलेस साडे सात लाखांचा गंडा
नाशिक : विविध योजनांचे आमिष दाखवून भामट्यांनी एका नोकरदार महिलेस तब्बल साडे सात लाख रूपयांना गंडविल्याचा प्रकार समोर आला आहे. विविध बँकाच्या युपीआय आयडीवर ही रक्कम भरण्यास भाग पाडण्यात आले असून याप्रकरणी सायबर पोलीस ठाण्यात फसवणुक आणि माहिती तंत्रज्ञान अधिनियम नुसार गुन्हा दाखल करण्यात आला आहे. शम्मी गिरीश शेट्टी (रा.मोटवाणी रोड,ना.रोड) यांनी याप्रकरणी तक्रार दाखल केली आहे. शेट्टी या नोकरदार असून गेल्या मे महिन्यात त्यांना ८५२६८५९८७०० या मोबाईल क्रमांकावरून संपर्क साधण्यात आला होता. यावेळी भामट्यांनी त्यांना मोबाईलवर एक अ‍ॅप डाऊनलोड करण्यास भाग पाडले. तसेच अल्पवेळेत कमी गुंतवणुकीवर जास्त मोबदला मिळेल अशा व विविध प्रकारच्या योजनाची माहिती देत त्यांना एसबीआय,अ‍ॅक्सीस आणि पीएनबी सारख्या अनेक बँकाच्या युपीआय आयडी वर रक्कम भरण्यास भाग पाडले. या काळात शेट्टी यांनी विविध बँकाच्या माध्यमातून साडे सात लाख रूपये भरले. त्यानंतर संबधीताशी संपर्क साधला असता तो होवू शकला नाही त्यामुळे आपली फसवणुक झाल्याचे लक्षात येताच शेट्टी यांनी पोलीसात धाव घेतली असून अधिक तपास पोलिस निरीक्षक देवराज बोरसे करीत आहेत.

…..

तरूणाची शेजा-यास मारहाण
नाशिक : कुठलेही कारण नसतांना एका तरूणाने आपल्या शेजा-यास बेदम मारहाण केल्याची घटना संतकबीरनगर भागात घडली. या घटनेत शेजा-यास जमिनीवर ढकलून दिल्याने त्याच्या डोक्यास आणि तोंडास दुखापत झाली असून याप्रकरणी गंगापूर पोलीस ठाण्यात गुन्हा दाखल करण्यात आला आहे. दिपक परशुराम पौळ (२० रा.महाराष्ट्र बेकरी समोर,संतकबीरनगर) असे मारहाण करणा-या संशयीताचे नाव आहे. याप्रकरणी बाळू संतू व्यवहारे (३२ रा.रा.सदर) यांनी तक्रार दाखल केली आहे. तक्रारदार आणि संशयीत एकमेकांचे शेजारी असून शनिवारी (दि.३) ही घटना घडली. व्यवहारे सायंकाळच्या सुमारास परिसरातील वंदना किराणा दुकानासमोरून पायी जात असतांना संशयीताने त्यास अडविले. यावेळी कुठलेही कारण नसतांना संशयीताने त्यांना शिवीगाळ करीत लाथाबुक्यांनी मारहाण केली. या झटापटीत व्यवहारे यांना रस्त्यावर ढकलून दिल्याने त्यांच्या डोक्यास व तोंडास दुखापत झाली असून अधिक तपास हवालदार डी.वाय.मोरे करीत आहेत.