नाशिक – अंबड लिंक रोडवरील संजीवनगरला १४ वर्षीय अल्पवयीन मुलीची आत्महत्या

संजीवनगरला १४ वर्षीय अल्पवयीन मुलीची आत्महत्या
नाशिक : अंबड लिंक रोडवरील संजीवनगर भागात राहणा-या १४ वर्षीय मुलीने गळफास लावून घेत आत्महत्या केली. तिच्या आत्महत्येचे कारण समजू शकले नाही. याप्रकरणी अंबड पोलीस ठाण्यात मृत्युची नोंद करण्यात आली आहे. श्रध्दा संजय सिंग (१४ रा.ओम हाईटस,संजीवनगर) असे आत्महत्या करणा-या मुलीचे नाव आहे. श्रध्दा सिंग हिने रविवारी (दि.४) आपल्या राहत्या घरात अज्ञात कारणातून पंख्याच्या हुकाला आोढणी बांधून गळफास लावून घेतला होता. त्यात तिचा मृत्यु झाला. याप्रकरणी पिंटू सिंग यांनी दिलेल्या खबरीवरून मृत्युची नोंद करण्यात आली असून अधिक तपास हवालदार टोपले करीत आहेत.

….

वेगवेगळया अपघातात दोन दुचाकीस्वार ठार
नाशिक : शाहर व परिसरात अपघाताची मालिका सुरूच असून रविवारी (दि.४) वेगवेगळया ठिकाणी झालेल्या अपघातांमध्ये दोन दुचाकीस्वारांचा मृत्यु झाला. त्यातील एकाचा दुभाजकावर तर दुस-याचा झाडावर आदळून मृत्यु झाला. ठार झालेल्या दुचाकीस्वारांमध्ये १७ वर्षीय मुलाचा समावेश आहे. याप्रकरणी आडगाव आणि गंगापूर पोलीस ठाण्यात अपघाताची नोंद करण्यात आली आहे. राजेंद्र शंकर बनकर (३१ रा.पेठे कॉलनी,इंदिरानगर) व आदित्य सचिन वाघ (१७ रा.सिडको) असे अपघातात ठार झालेल्या दुचाकीस्वारांचे नाव आहे. बनकर आपल्या दुचाकीने औरंगाबाद रोडने प्रवास करीत असतांना ओढा गावाजवळ भरधाव दुचाकी दुभाजकावर आदळली. या अपघातात गंभीर जखमी झाल्याने त्यांना तातडीने जिल्हा रूग्णालयात दाखल केले असता वैद्यकीय सुत्रांनी तपासून मृत घोषीत केले. याप्रकरणी आडगाव पोलीस ठाण्यात मृत्युची नोंद करण्यात आली असून अधिक तपास हवालदार गांगुर्डे करीत आहेत. दुसरा अपघात गंगापूररोड भागात झाला. आदित्य वाघ गंगापूररोडने आपल्या दुचाकीवर प्रवास करीत असतांना नवश्या गणपती मंदिर परिसरात भरधाव दुचाकी रस्त्यातील झाडावर आदळली. या अपघातात आदित्य गंभीर जखमी झाला होता. स्थानिकांसह पोलीसांनी त्यास तात्काळ जिल्हा रूग्णालयात दाखल केले असता वैद्यकीय सुत्रांनी त्यास मृत घोषीत केले. याप्रकरणी गंगापूर पोलीस ठाण्यात मृत्युची नोंद करण्यात आली असून अधिक तपास हवालदार झाडे करीत आहेत.