नाशिक- आॉफिस फोडून रोकडसह डेअरी प्रॅाडक्ट चोरी

आॉफिस फोडून रोकडसह डेअरी प्रॅाडक्ट चोरी
नाशिक : वितरकाचे ऑफिस फोडून चोरट्यांनी रोकडसह डेअरी प्रॅाडक्ट चोरून नेल्याची घटना राजीवनगर भागात घडली. या प्रकरणी इंदिरानगर पोलीस ठाण्यात घरफोडीचा गुन्हा दाखल करण्यात आला आहे. दिपक दिलीप आव्हाड (रा.गंगापूर रोड) यांनी तक्रार दाखल केली आहे. आव्हाड यांचे राजीव नगर येथील सुमन पेट्रोल पंपा मागे पॉवर डेअरी लिमीटेड नावाचे कार्यालय आहे. या ठिकाणाहून किरकोळ विक्रेत्यांना डेअरी प्रोडक्ट आणि तूप डब्यांचा पूरवठा केला जातो. शनिवारी (दि.३)अज्ञात चोरट्यांनी त्यांच्या कार्यालयाच्या मागील पत्रा उचकटून ही चोरी केली. कार्यालयात शिरलेल्या भामट्यांनी गल्यातील रोकड, डेअरी प्रॅाडक्ट आणि तुपाचे डबे असा सुमारे १ लाख ८५ हजार ८६४ रूपयांचा ऐवज चोरून नेला. अधिक तपास उपनिरीक्षक उघडे करीत आहेत.

…..

रौलेट जुगार खेळविणारी दुकली जेरबंद
नाशिक : स्व:ताच्या फायद्यासाठी जुगारींना आयडी पासवर्ड देवून ऑनलाईन रौलेट जुगार खेळविणा-या दोघांना पोलीसांनी बेड्या ठोकल्या. संशयीतांच्या ताब्यातून रोकडसह जुगाराचे साहित्य जमा करण्यात आले असून याप्रकरणी नाशिकरोड पोलीस ठाण्यात गुन्हा दाखल करण्यात आला आहे.संदिप उर्फ हुसळय़ा नरसिंग शिंदे (रा.अरींगळामळा,सिन्नरफाटा) व राजू शेख (रा.सुभाषरोड ना.रोड) अशी अटक केलेल्या संशयीतांची नावे आहेत. याप्रकरणी पोलीस कर्मचारी लक्ष्मण न-हेराव यांनी तक्रार दाखल केली आहे. अरिंगळे मळा भागात रस्त्याच्या कडेला असलेल्या एका झाडाखाली दोन तरून नागरीकांनी ऑनलाईन जुगार खेळविण्यास भाग पाडत असल्याची माहिती नाशिकरोड पोलीसांना मिळाली होती. त्यानुसार शनिवारी (दि.३) पोलीसांनी धाव घेत सापळा रचला असता संशयीत पोलीसांच्या जाळयात अडकले. संशयीत फनरेप नावाच्या अ‍ॅपवर रौलेट नावाचा जुगार खेळतांना व खेळवितांना मिळून आले. अधिक तपास पोलीस नाईक बागुल करीत आहेत.
…..