टोळक्याकडून महिलेचा विनयभंग
नाशिक : घरात घुसून टोळक्याने जीवंत जाळण्याची धमकी देत व बेदम मारहाण करीत, एका महिलेचा विनयभंग केल्याची घटना टोगोरनगर भागात घडली. जुन्या वादातून ही घटना घडली असून, संशयीतांमध्ये तीन महिलांसह दोन पुरूषांचा समावेश आहे. याप्रकरणी उपनगर पोलीस ठाण्यात विविध कलमान्वये गुन्हा दाखल करण्यात आला आहे. महाराज नगर भागात राहणा-या पीडित महिलेने याप्रकरणी तक्रार दाखल केली आहे. पोलीसांनी दिलेल्या माहितीनुसार संशयीत सुजाता हरीदास बर्वे, भालचंद्र भुजबळ, अर्जुन काळे, स्नेहल आणि अन्य एक अनोळखी महिला आदींनी महिलेस मारहाण केली. गेल्या शुक्रवारी (दि.२५) सायंकाळच्या सुमारास पीडित महिला आपल्या घरात एकटी असतांना संशयीत टोळक्याने तिच्या घरात प्रवेश केला. यावेळी मागील भांडणाची कुरापत काढून संशयीतांनी तिला शिवीगाळ करीत लाथाबुक्यांनी मारहाण केली. यावेळी जिवंत जाळण्याची धमकी देत संशयीतांनी विनयभंग केला. अधिक तपास सहाय्यक निरीक्षक खडके करीत आहेत.
…..
सोमेश्वर कॉलनीत तडीपार जेरबंद
नाशिक : शहर आणि जिह्यातून एक वर्षासाठी हद्दपार केलेले असतांना शहरात राजरोसपणे वावरणा-या तडीपारास पोलीसांनी अटक केली. ही कारवाई सोमेश्वर कॉलनीतील काळे मळा भागात करण्यात आली. याप्रकरणी सातपूर पोलीस ठाण्यात गुन्हा दाखल करण्यात आला आहे. समीर अमित शाह (२३ रा.श्रमिकनगर,गंजमाळ) असे अटक केलेल्या संशयीत तडीपाराचे नाव आहे. शाह याच्याविरूध्द भद्रकाली आणि देवळाली कॅम्प पोलीस ठाण्यात गंभीर गुन्हे दाखल आहेत. त्याच्या गुन्हेगारी कारवायांमध्ये सातत्याने वाढ होत असल्याने शहर पोलीसांनी त्यास गेल्या वर्षी शहर आणि जिह्यातून एक वर्षासाठी हद्दपार केले आहे. मात्र त्याचा वावर शहरातच असल्याची माहिती पोलीसाना मिळाली होती. पोलीस त्याच्या मागावर असतांना सोमवारी (दि.२८) दुपारी तो सोमेश्वर कॉलनीतील काळे मळा भागात येणार असल्याची माहिती सातपूर पोलीसांना मिळाली होती. त्यानुसार सापळा लावला असता तो पोलीसांच्या जाळय़ात अडकला. याप्रकरणी पोलीस शिपाई विजयकुमार जिरे यांनी दिलेल्या तक्रारीवरून गुन्हा दाखल करण्यात आला असून अधिक तपास हवालदार गिते करीत आहेत.
