अल्पवयीन मुलीचा विनयभंग
नाशिक : घरात झोपलेल्या अल्पवयीन मुलीचा नातेवाईक तरूणाने विनयभंग केल्याची घटना फुलेनगर भागात घडली. संशयीतास पोलीसांनी बेड्या ठोकल्या असून याप्रकरणी पंचवटी पोलीस ठाण्यात विनयभंग आणि बालकांचे लैंगिक अत्याचार संरक्षण अधिनियम (पोस्को) कायद्यान्वये गुन्हा दाखल करण्यात आला आहे.
मनोज सुरेश शिंदे (२० रा.मच्छीबाजार जवळ,फुलेनगर) असे संशयीताचे नाव आहे. याप्रकरणी पीडित मुलीच्या आजीने तक्रार दाखल केली आहे. संशयीत आणि पीडित मुलगी एकमेकांची नातेवाईक आहेत. सोमवारी (दि.२१) मुलगी घरात एकटी झोपलेली असल्याची संधीं साधत त्याने घरात जावून विनयभंग केला. अधिक तपास उपनिरीक्षक पाटील करीत आहेत.
….
शहरात दोघांच्या आत्महत्या
नाशिक : शहर व परिसरात आत्महत्येचे सत्र सुरूच असून सोमवारी (दि.२१) वेगवेगळया भागात राहणा-या दोघांनी आत्महत्या केल्या. त्यातील एकाने विषारी औषध सेवन करून तर दुस-याने गळफास लावून घेत जीवन संपविले. दोघांच्याही आत्महत्येचे कारण समजू शकले नाही. याप्रकरणी अंबड आणि भद्रकाली पोलीस ठाण्यात मृत्युची नोंद करण्यात आली आहे. पोलीसांनी दिलेल्या माहिती नुसार सिडकोतील सावतानगर भागात राहणा-या भुषण विजय बडगुजर (३४ रा.भगवती चौक) याने अज्ञात कारणातून आपल्या राहत्या घरातील हॉलमधील पंख्याच्या लोखंडी रॉडला दोरी बांधून गळफास लावून घेतला होता. त्यात त्याचा मृत्यु झाला. धनंजय देशमुख यांनी दिलेल्या खबरीवरून अंबड पोलीस ठाण्यात मृत्युची नोंद करण्यात आली असून अधिक तपास पोलीस नाईक परदेशी करीत आहेत. दुसरी घटना जुने नाशिक भागातील काझीगडी भागात घडली. विशाल शंभु उत्तरडे (४५ रा.दत्तमंदिराजवळ) यांनी अज्ञात कारणातून आपल्या राहते घरी विषारी औषध सेवन करून आत्महत्या केली. याबाबत निलेश भालेराव यांनी खबर दिल्याने भद्रकाली पोलीसठाण्यात मृत्युची नोंद करण्यात आली असून अधिक तपास हवालदार पाळदे करीत आहेत.
