नाशिक – घर भाडेतत्वावर दिले नाही म्हणून रागातून महिलेस मारहाण

महिलेचा विनयभंग
नाशिक – घर भाडेतत्वावर दिले नाही या रागातून मावशीच्या जावयाने महिलेस मारहाण करत तीचे कपडे फाडून विनयभंग केल्याची घटना मंगळवारी (दि.१५) पेठरोड परिसरात घडली. पंकज संजय सावंत (रा. गजवक्र नगर, अश्‍विमेधनगर) असें गुन्हा दाखल झालेल्या संशयिताचे नाव आहे. पोलीसांनी दिलेल्या माहितीनुसार संशयित हा पीडित महिलेच्या मावशीचा जावई आहे. त्याला भाडे कराराने हवे असलेले घर पीडितेने दिले नाही. या रागातून त्याने भाजीपाला खरेदी करण्यासाठी गेलेल्या पीडित महिलेचा बाजारात हात पिरगळला तसेच पाठलाग करून अंगावरील कपडे फाडून विनयभंग केला. या प्रकरणी पीडितेच्या तक्रारीनुसार संशयित सावंत यावर विनयभंगाचा गुन्हा पंचवटी पोलीस ठाण्यात दाखल करण्यात आला आहे. अधिक तपास सहायक निरिक्षक गवळी करत आहेत.

…..

हॉटेलमध्ये युवकाची आत्महत्या
नाशिक – सातपूर येथील एका हॉटेलमध्ये २७ वर्षीय युवकाने गळफास घेत आत्महत्या केल्याचा प्रकार शुक्रवारी (दि.१८) सकाळी उघडकीस आला आहे. साई प्रसाद मुळे (रा. सातपुर) असे या युवकाचे नाव आहे. पोलीसांनी दिलेल्या माहितीनुसार क्विटर पॉइंट येथील हॉटेल संतोष येथे साईप्रसाद याने शुक्रवारी सकाळी इलेक्ट्रीकच्या वायरला कापडाच्या सहाय्याने गळफास घेतल्याचे आढळून आले. याप्रकरणी सापतूर पोलिस ठाण्यात आकस्मिक मृत्यूची नोंद करण्यात आली आहे. अधिक तपास सहायक निरिक्षक सय्यद करत आहेत.

…..

सर्प दंशाने बालकाचा मृत्यु
नाशिक – पावसामुळे सर्पदंश होण्याचे प्रमाण वाढीस लागले असून त्र्यंबकेश्वर तालुक्यातील शिवणगाव येथे सर्पदंशामुळे सहा वर्षीय मुलाचा मृत्यू झाल्याची घटना घडली. समाधान अशोक राठोड (६, रा. शिवनगाव) असे यात मृत्यु झालेल्या मुलाचे नाव आहे. पोलीसांनी दिलेल्या माहितीनुसार समाधान हा सोमवारी (दि.१४) घराबाहेर असताना त्याच्या पाठीस सापाने चावा घेतला. त्याच्यावर रुग्णालयात उपचार सुरु होते. मात्र उपचारादरम्यान त्याचा मृत्यू झाला. याप्रकरणी त्र्यंबकेश्वर पोलिस ठाण्यात आकस्मिक मृत्यूची नोंद करण्यात आली आहे.