नाशिक : काठे गल्ली सिग्नल भागात रस्त्यावर पडलेला चश्मा उचलल्याने रिक्षाचालकाने एकास शिवीगाळ करीत मारहाण केल्याची घटना घडली. या घटनेत तरूणाच्या डोक्यात लोखंडी पाईप मारण्यात आल्याने तो जखमी झाला असून याप्रकरणी भद्रकाली पोलिस ठाण्यात गुन्हा दाखल करण्यात आला आहे. अनिकेत संजय साळुंके (२१ रा.भाऊसाहेब हिरे नगर,नाशिक पुणा रोड) या युवकाने याप्रकरणी तक्रार दाखल केली आहे. साळुंके शुक्रवारी (दि.२४) दुपारच्या सुमारास काठे नगर सिग्नल भागातून जात असतांना त्यास रस्त्यावर चष्मा पडलेला दिसला. साळुंके चष्मा उचलत असतांना शेजारील थांब्यावरील रिक्षाचालक अकबर याने त्यास शिवीगाळ करून लाथाबुक्यांनी बेदम मारहाण केली. यावेळी संतप्त अकबरने रिक्षातील लोखंडी पाईप काढून आणत तो साळुंखे यांच्या डोक्यात मारल्याने तो जखमी झाला असून अधिक तपास उपनिरीक्षक पवार करीत आहेत.
