काझीगडी भागात १ लाख १० हजार रूपयाचे ऐवज चोरट्यांनी केले लंपास
नाशिक : अमरधामरोडवरील काझीगडी भागात घरात शिरून चोरट्यांनी सुमारे १ लाख १० हजार रूपयाचे ऐवज लंपास केले. त्यात ४० हजाराच्या रोकडसह सोन्याचांदीच्या दागिण्यांचा समावेश आहे. याप्रकरणी भद्रकाली पोलिस ठाण्यात चोरीचा गुन्हा दाखल करण्यात आला आहे. आशा फकिरराव राऊत (रा.कुभारवाडा,ठाकरे दवाखान्यामागे,काझीगढी) यांनी याप्रकरणी तक्रार दाखल केली आहे. राऊत यांचे दोन मजली घर आहे. अज्ञात चोरट्यांनी मंगळवारी (दि ७) रात्री वरच्या मजल्यावरील उघड्या घरात चोरून ही चोरी केली. अज्ञात चोरट्यांनी बेडरूममधील कपाट उघडून त्यातील रोकडसह सोन्याचांदीचे दागिणे असा सुमारे १ लाख १० हजार रूपये किमतीचा ऐवज चोरून नेला. अधिक तपास सहाय्यक निरीक्षक सपकाळे करीत आहेत.
मखमलाबादरोड भागात मोबाईलसह देवा-ह्यातील चांदीचे देव चोरीला
नाशिक : मखमलाबादरोड भागात दरवाजाच्या फटीत हात घालून आतील कडी उघडून चोरट्यानी मोबाईलसह देवा-ह्यातील चांदीचे देव चोरून नेल्याची घटना घडली आहे. या चोरीप्रकरणी गणेश कैलास धात्रक (३९ रा.गणेश चौक,क्रांतीनगर) यांनी तक्रार दाखल केली असून पंचवटी पोलिस ठाण्यात चोरीचा गुन्हा दाखल करण्यात आला आहे. धात्रक कुटुंबिय मंगळवारी रात्री आपल्या घरात झोपलेले असतांना ही घटना घडली. अज्ञात चोरट्यांनी त्यांच्या बंद घराच्या दरवाजाच्या फटीतून हात घालून आतून लावलेली कडी उघडून ही चोरी केली. घरात शिरलेल्या भामट्यांनी मोबाईलसह देवा-ह्यातील सुमारे १२ हजार रूपये किमतीचे चांदीचे देव चोरून नेले. अधिक तपास उपनिरीक्षक पाटील करीत आहेत.
