नाशिक – चेहडी शिव भागात मद्यसेवन करण्याच्या वादातून दोघांनी एकास बेदम मारहाण केल्याची घटना घडली. याप्रकरणी पराग राजेंद्र गायधनी (३० रा.विद्यानगरी,जेलरोड) यांनी तक्रार दाखल केली असून नाशिकरोड पोलिस ठाण्यात गुन्हा दाखल करण्यात आला आहे. या मारहाणी प्रकरणात दोन्ही संशयितांना अटक करण्यात आली आहे. चिंटू विवेकानंद वाघमारे (२५ रा.शोभा कॉलनी,दत्तमंदिर) व मयूर राजेंद्र मुथ्था (२२ रा.दुर्गानगर अमृतधाम) अशी अटक करण्यात आलेल्या संशयितांची नावे आहेत. गायधनी शुक्रवारी रात्री चेहडी शिव भागात गेले होते. सीएनजी पेट्रोल पंप भागात संशयितांनी त्यास गाठून दारू पिण्याच्या कारणातून वाद घातला. यावेळी झालेल्या झटापटीत संशयित वाघमारे याने डोक्यात कु-हाड मारली तर मुथ्था याने दगडाने गायधनी यास बेदम मारहाण करीत जीवे मारण्याची धमकी दिली. अधिक तपास उपनिरीक्षक शिंदे करीत आहेत.
