दुचाकी झाडावर आदळल्याने चालक ठार
नाशिक : भरधाव दुचाकी झाडावर आदळल्याने दुचाकीस्वार ठार झाला. हा अपघात दिंडोरीरोडवरील आकाश पेट्रोल पंपासमोर झाला. याप्रकरणी म्हसरूळ पोलीस ठाण्यात मृत्युची नोंद करण्यात आली आहे. प्रकाश बापू आहिरे (३८ रा.धनपुजा अपा.आदर्श नगर,बोरगड) असे मृत दुचाकीस्वाराचे नाव आहे. आहिरे बुधवारी (दि.९) रात्री पंचवटीकडून म्हसरूळच्या दिशेने आपल्या दुचाकीवर (एमएच १५ बीएफ ०९६६) प्रवास करीत असतांना हा अपघात झाला. भरधाव वेगात जात असतांना दिंडोरीरोडवरील आकाश पेट्रोल पंपासमोरील वडाच्या झाडाला दुचाकीने धडक दिली. या अपघातात आहिरे गंभीर जखमी झाल्याने त्यांचा मृत्यु झाला. तर दुचाकीचेही मोठे नुकसान झाले असून अधिक तपास उपनिरीक्षक पवार करीत आहेत.
…..
दुचाकीस्वारावर कोयत्याने हल्ला
नाशिक : मागील भांडणाची कुरापत काढून एकाने दुचाकी अडवित चालकावर कोयत्याने हल्ला केल्याची घटना सिध्दार्थ नगर भागात घडली. हल्ला करणारा संशयीत पोलीस रेकॉर्डवरील गुन्हेगार असून याप्रकरणी गंगापूर पोलीस ठाण्यात गुन्हा दाखल करण्यात आला आहे. दिलीप उर्फ छोटू विष्णू गायकवाड (रा.सिध्दार्थ नगर) असे संशयीताचे नाव आहे. याप्रकरणी शंकर नाना शिंदे (३७ रा.बॉईज टाऊन मागे,सिध्दार्थ नगर) या जखमी दुचाकीस्वाराने तक्रार दाखल केली आहे. शिंदे आणि त्यांचा मित्र बिपीन गुरूवारी (दि.१०) रात्री दुचाकीवर प्रवास करीत असतांना ही घटना घडली. दोघे मित्र सिध्दार्थ नगर मधून दुचाकीने घरी जात असतांना मनोहर तात्या यांच्या किराणा दुकानासमोर हातात कोयता घेवून उभ्या असलेल्या संशयीताने दुचाकी अडविली. यावेळी मागील भांडणाची कुरापत काढून संशयीतांने शिंदे यांना शिवीगाळ केली. तसेच मी येथील दादा आहे असे म्हणत परिसरात दहशत माजवित शिंदे यांच्यावर कोयत्याने हल्ला केला. या घटनेत शिंदे जखमी झाले असून अधिक तपास हवालदार मोरे करीत आहेत.
…..
