चोरट्यांनी दोन लाखाचे फोटोग्राफीचे साहित्य केले लंपास
नाशिक : अशोकस्तंभ भागात पार्क केलेल्या कारची काच फोडून चोरट्यांनी सुमारे दोन लाख रूपये किमतीचे फोटोग्राफीचे साहित्य चोरून नेल्याची घटना घडली आहे. तेजस अनिल साबळे (रा.नायगावरोड सिन्नर) यांनी याप्रकरणी तक्रार दाखल केली असून याप्रकरणी सरकारवाडा पोलीस ठाण्यात गुन्हा दाखल करण्यात आला आहे. साबळे व अनिकेत रोडो हे दोघे मित्र बुधवारी कामानिमित्त शहरात आले होते. अशोक स्तंभ येथील कृष्णाई वडापाव सेंटर परिसरात त्यांनी आपली कार पार्क केली असता ही घटना घडली. अज्ञात चोरट्यांनी कारची काच फोडून कॅनोन कंपनीचा कॅमेरा,लेन्स,फ्लॅशलाईट व अन्य फोटोग्राफीचे साहित्य आणि लॅपटॉप असा सुमारे १ लाख ९१ हजाराचा ऐवज चोरून नेला. अधिक तपास उपनिरीक्षक कोल्हे करीत आहेत.
घरफोडीत चोरट्यांनी ७३ हजाराच्या ऐवजावर डल्ला
नाशिक : सिडकोतील उत्तमनगर भागात झालेल्या घरफोडीत चोरट्यांनी ७३ हजाराच्या ऐवजावर डल्ला मारला. त्यात २० हजाराच्या रोकडसह सोन्याचांदीच्या दागिण्यांचा समावेश आहे. याप्रकरणी अबड पोलीस ठाण्यात घरफोडीचा गुन्हा दाखल करण्यात आला आहे. शाम मधुकर पेठकर (रा.ओमकारेश्वर मंदिराजवळ,म.फुलेनगर) यांनी तक्रार दाखल केली आहे. पेठकर कुटूंबिय दि.१५ ते १९ एप्रिल दरम्यान बाहेरगावी गेले असता ही घटना घडली. अज्ञात चोरट्यांनी त्यांच्या बंद घराचा कडीकोयंडा तोडून कपाटात ठेवलेली २० हजाराची रोकड व सोन्याचांदीचे दागिणे असा सुमारे ७३ हजाराचा ऐवज चोरून नेला. अधिक तपास हवालदार शेख करीत आहेत.
