नाशिक (इंडिया दर्पण वृत्तसेवा) – देवळा तालुक्यातील लोहोणेर येथे प्रेमप्रकरणातून झालेल्या जळीतकांडातील युवकाचा अखेर मृत्यू झाला आहे. आज सर्वत्र व्हॅलेंटाईन डे साजरा होत असून याच दिवशी ही दुर्दैवी घचना घडली आहे. याप्रकरणातील प्रेयसी आणि तिचे कुटुंबिय सध्या अटकेत आहेत. मात्र, या युवकाच्या मृत्यूमुळे सर्वत्र हळहळ व्यक्त होत आहे.
दोन दिवसांपूर्वी लोहोणेर येथे हृदयद्रावक घटना घडली होती. प्रेमप्रकरणातून गोरख बच्छाव या युवकाला दिवसाढवळ्या जिवंत जाळण्याचा प्रयत्न करण्यात आला. प्रेयसीनेच त्याला पेटविल्याचे प्रत्यक्षदर्शींनी सांगितले. या दुर्घटनेत गोरख हा युवक गंभीर भाजला. त्याला तातडीने जिल्हा सामान्य रुग्णालय उपचारार्थ दाखल करण्यात आले. त्याच्यावर गेल्या दोन दिवसांपासून उपचार सुरू होते. मात्र, मध्यरात्रीच्या सुमारास त्याची प्रकृती खालावली आणि त्याची प्राणज्योत मालवली.
दरम्यान, लोहोणेर येथील घटनेनंतर संपुर्ण महाराष्ट्र हादरला होता. याप्रकरणी मुलीच्या घरच्यांना देवळा पोलिसांनी ताब्यात घेतले. त्यांना पाच दिवसांची पोलीस कोठडी सुनावण्यात आली. दरम्यान, या घटनेमुळे परिसरात हळहळ व्यक्त करण्यात येत आहे.
