इंडिया दर्पण ऑनलाईन डेस्क – कोणताही समारंभ असला की, त्यामध्ये डीजे वाद्य प्रकार जणू काही अत्यावश्यक समजले जाते. परंतु डीजेच्या कर्णकर्कश्य आणि कानठाळ्या बसणाऱ्या आवाजामुळे आबालवृद्धांना त्रास होतो. याची कुणीही काळजी घेत नाही. एका ठिकाणी डिजेवर मनपसंत गाणे लावले नाही म्हणून काही तरुणांनी चांगलाच गोंधळ घातला
लखनऊमध्ये, मोहनलालगंज परिसरामधील कलंदरखेडा येथे डीजेवर आवडते गाणे वाजवले नाही म्हणून काही तरुणांनी गोंधळ घातला. मुंडण समारंभात सहभागी होण्यासाठी आलेल्या मुलालाही आरोपींनी बेदम मारहाण केली. हा गोंधळ पाहून ग्रामस्य पांगले. या प्रकरणी पीडितांनी मोहनलालगंज पोलीस ठाण्यात गुन्हा दाखल केला आहे.
काळदनखेडा येथील रहिवासी विनोद यांच्या घरी मुंडन सोहळा पार पडला. रात्री मेजवानी होती. यामध्ये काही जण डीजेच्या तालावर नाचत होते. दरम्यान, पिंटूने डीजे ऑपरेटरला त्याच्या आवडीचे गाणे वाजवण्यास सांगितले. मात्र ऑपरेटरने ते वाजवण्यास नकार दिला. या प्रकरणावरून वाद सुरू झाला. मद्यधुंद पिंटू, करमचंद आणि जितेंद्र यांनी विनोदला मारहाण करण्यास सुरुवात केली.
हे भांडण पाहून रवी आणि आरती हे दोघे मदतीला धावले. आरोपींनी त्यांनाही मारहाणही केली होती. मुंडण समारंभात झालेल्या भांडणाची माहिती कनकहा पोलीस चौकीला देण्यात आली. पोलिस कर्मचारी उशिराने घटनास्थळी पोहोचले होते. त्यामुळे आरोपी पळून गेले होते. पोलिसांनी दिलेल्या माहितीनुसार, गुन्हा दाखल केल्यानंतर तपास सुरू आहे.