इंडिया दर्पण ऑनलाईन डेस्क – जगभरातील क्रिकेट शौकिनांचे लक्ष भारत आणि पाकिस्तान यांच्यात होणाऱ्या सामन्याकडे लागले आहे. आशिया चषक स्पर्धेत हा सामना येत्या रविवारी, १० सप्टेेंबर रोजी होणार आहे. मात्र, या सामन्यावर पावसाचे सावट आहे. त्याची दखल घेत आशियाई क्रिकेट परिषदेने (ACC) आज महत्त्वाचा निर्णय घेतला आहे. १० सप्टेंबर रोजी भारत आणि पाकिस्तान यांच्यात होणार्‍या आशिया कपच्या सुपर-४ सामन्यासाठी नियम बदलले आहेत. तशी घोषणा एसीसीने केली आहे.
१० सप्टेंबर, रविवारी होणाऱ्या या सामन्यात पावसाने व्यत्यय आला तर हा सामना राखीव दिवशी पूर्ण होईल. यापूर्वी आशिया चषक स्पर्धेत सर्व नियमांमध्ये राखीव दिवस नव्हता. एसीसीने भारत-पाक सामन्यासाठी हा नियम जाहीर केला आहे.
आशिया चषक स्पर्धेत भारत आणि पाकिस्तान यांच्यातील दुसरा सामना रविवारी होणार आहे. २ सप्टेंबर रोजी दोन्ही संघांमध्ये गट फेरीत एक सामना खेळवण्यात आला होता, परंतु तो पावसामुळे रद्द करण्यात आला होता. विशेष म्हणजे भारत-पाकिस्तान सामना हा सुपर-४ मधील एकमेव सामना आहे ज्यासाठी राखीव दिवस ठेवण्यात आला आहे. इतर कोणत्याही सुपर-४ सामन्यासाठी ही सुविधा उपलब्ध होणार नाही. याशिवाय १७ सप्टेंबर रोजी होणाऱ्या अंतिम सामन्यासाठी राखीव दिवस आहे.
भारत आणि पाकिस्तान यांच्यातील हा सामना श्रीलंकेची राजधानी कोलंबो येथील आर प्रेमदासा स्टेडियमवर होणार आहे. कोलंबोमध्ये गेल्या काही दिवसांपासून सतत पाऊस पडत आहे. त्यातून सामन्यांचे यजमानपद काढून घेण्याचीही चर्चा होती. हे सामने हंबनटोटा किंवा दांबुला येथे हलवले जातील, असे मानले जात होते, परंतु तसे झाले नाही. आता आशिया चषकाचे उर्वरित सर्व सामने येथे खेळवले जातील.
Accuweather वेबसाइटनुसार, सामन्याच्या दिवशी पावसाची शक्यता ९० टक्के आहे. रात्री गडगडाटासह वादळाचीही शक्यता आहे. दिवसाच्या तुलनेत रात्री पावसाचा जोर वाढू शकतो. त्याची शक्यता ९६ टक्क्यांपर्यंत आहे. रात्रभर ढगाळ हवामान राहण्याची शक्यता ९८ टक्के आहे. Weather.com ने देखील पावसाची ९० टक्के शक्यता वर्तवली आहे.
दरम्यान, भारत आणि पाकिस्तान यांच्यातील कोलंबोतील सामना रद्द झाल्यास हा सामना राखीव दिवशी होईल. राखीव दिवशीही निकाल कळला नाही, तर दोन्ही संघांना प्रत्येकी एका गुणावर समाधान मानावे लागेल.
Cricket Asia Cup India Pakistan Match Rain ACC
Sports
