इंडिया दर्पण ऑलनाईन डेस्क
नाशिक जिल्हा क्रिकेट असोसिएशनचा १६ वर्षांखालील अष्टपैलू खेळाडू – मुख्यतः डावखुरा फिरकीपटू व उपयुक्त फलंदाज – नील चंद्रात्रे याची १६ वर्षांखालील वयोगटात भारतीय क्रिकेट नियामक मंडळ – बीसीसीआय तर्फे आयोजित नॅशनल क्रिकेट अकादमी – एन सी ए – च्या हाय परफॉरमन्स कॅम्प – उच्च कामगिरी शिबिर – साठी निवड झाली आहे.
माजी कसोटीपटू व्हि व्हि एस लक्ष्मण प्रमुख असलेल्या एन सी ए, बेंगळुरू येथे १८ एप्रिल ते १२ मे दरम्यान हे शिबिर होत आहे. नीलसह महाराष्ट्राच्या प्रज्वल मोरे व प्रणव शिंदे यांची देखील निवड आली आहे.
या हंगामात बी सी सी आय च्या १६ वर्षांखालील विजय मर्चंट ट्रॉफी स्पर्धेत तीन सामन्यात एकूण ३१ बळी घेत नील चंद्रात्रेने आपल्या भेदक डावखुरया फिरकी गोलंदाजीने अफलातून कामगिरी करून महाराष्ट्रात सर्वोत्तम तर भारतात तिसरे स्थान मिळवले. गोवाविरुद्धच्या सामन्यात ७ व ८ असे एकूण १५ बळी , तर वडोदराविरुद्ध दोन्ही डावात प्रत्येकी ५ बळी घेत सामन्यात एकूण १० बळी घेण्याची जोरदार कामगिरी केली होती व महाराष्ट्र संघाला उपांत्यपूर्व फेरीत नेण्यात मोठा वाटा उचलला. उपांत्यपूर्व फेरीतहि महाराष्ट्र संघातर्फे मध्य प्रदेश विरुद्ध दुसऱ्या डावात ५ बळी घेत सामन्यात एकूण ६ बळी घेण्याची प्रभावी कामगिरी केली.
वेळोवेळी झालेल्या राष्ट्रीय व राज्यस्तरीय स्पर्धेत केलेल्या लक्षणीय कामगिरीच्या जोरावरच १६ वर्षांखालील महाराष्ट्राच्या संघापाठोपाठ आता नीलची एन सी ए च्या राष्ट्रीय पातळीवरील खास शिबिरासाठी निवड झाली आहे.
नील चंद्रात्रेच्या या अतिशय महत्वाच्या शिबिरासाठी झालेल्या निवडीबद्दल नाशिक जिल्हा क्रिकेट संघटनेचे चेअरमन विनोद शहा, सचिव समीर रकटे तसेच संघ प्रशिक्षक व जिल्हा क्रिकेट संघटनेच्या पदाधिकाऱ्यांनी नीलचे अभिनंदन करून पुढील वाटचालीस शुभेच्छा दिल्या आहेत.
