नवी दिल्ली – भारत आणि अमेरिकेसह जगभरात कोरोनाच्या प्रकोपात आता तरुण सर्वाधिक बाधित होत असल्याचे निष्पन्न होत आहे. भारतातही ब्रिटन, ब्राझील आणि दक्षिण अफ्रिकेतील स्ट्रेन आढळला आहे. दिल्ली, मुंबईसह इतर शहरांमध्ये कोरोनाबाधितांमध्ये तरुणांची संख्या लक्षणीयरित्या वाढली आहे. एका अहवालानुसार, मुंबईत १ ते ११ एप्रिलपर्यंत कोरोनामुळे मृत्यू झालेल्यांपैकी १० टक्के रुग्ण ४५ वर्षांच्या खालील होते. अमेरिकेत कोरोना विषाणूचा ब्रिटन स्ट्रेनचा (बी. १.१.७) प्रादुर्भाव इतका वाढला, की रुग्णालयात तरुण रुणांची एकच गर्दी झाली आहे.
म्हणून तरुण बाधित
यूएस सेंटर डिसिस कंट्रोल अँड प्रिव्हेंशनचे संचालक डॉ. रॉचेल वालेंस्की यांच्या माहितीनुसार, तरुणांचे लसीकरण न झाल्यामुळे त्यांची रुग्णसंख्या झपाट्याने वाढत आहे. कोरोनाचे ४० टक्के नवे रुग्ण विषाणूचा नवा प्रकार बी. १.१.७ मुळे अधिक बाधित झाले आहेत. विषाणूच्या नवा प्रकाराचा लहान मुलांनाही लवकर संसर्ग होत आहे, असे डॉ. जस्टिन स्क्रिंस्की यांनी सांगितले.
मुंबईत मृत्यू वाढले
मुंबईत १ ते ११ एप्रिलदरम्यान कोरोनामुळे मृत्यू झालेल्यांची संख्या मार्चमध्ये झालेल्या मृत्यूच्या तुलनेत ५५ टक्के अधिक आहेत. विशेष म्हणजे मृतांमध्ये ४५ वर्षांपेक्षा कमी वय असलेल्या मृतांचा आकडा १० टक्के आहे. यामध्ये गृहविलगीकरणात सात ते आठ दिवस राहिलेल्या तरुणांची संख्या अधिक आहे. मुंबईत मार्चमध्ये २१५ कोरोनाग्रस्तांचा मृत्यू झाला आहे. ११ एप्रिलपर्यंत हा आकडा ३३३ झाला आहे.
दुर्लक्षही कारणीभूत
आपण तरुण आहोत, त्यामुळे आपण लगेच बरे होऊन जाऊ, आपल्याला काहीच होणार नाही, अशा भ्रमात तरुणांनी राहू नये. तरुणांनी याकडे दुर्लक्ष करू नये, असा सल्ला डॉ. मेगन रेनी यांनी दिला आहे. काही तरुण सहजपणे यातून बरेही झाले असतील. परंतु सगळ्यांचेच नशीब बलवत्तर नसते. केवळ एक-दोन विषाणूच्या संपर्कात आल्यावर कोणीही आजारी पडण्याची शक्यता कमी आहे. परंतु एखाद्या व्यक्तिला विषाणूच्या अधिक संख्येने संसर्ग झाल्यास तो कितीही सुदृढ असला तरी त्याची प्रकृती गंभीरही होऊ शकते, असे डॉ. रेनी यांनी सांगितले. श्वास घेताना त्रास आणि थकव्याकडे अजिबात दुर्लक्ष करता येणार नाही, असा सल्ला डॉक्टरांनी दिला आहे.
